Վարդենիսի Կոմիտաս Կարապետյանի անվան գեղարվեստի դպրոցի սաներն արժանացել են մրցանակների

ԳԱՎԱՌ, 19 ՀՈՒՆԻՍԻ, ԱՐՄԵՆՊՐԵՍ։ Գեղարքունիքի մարզի Վարդենիս համայնքի Կոմիտաս Կարապետյանի անվան գեղարվեստի դպրոցի սաները վերջերս մասնակցել են «Մինորա» մշակութային կենտրոնի «Էտյուդ» նկարչական մրցույթ-փառատոնին և զբաղեցրել են բարձր հորիզոնականներ: 

Ինչպես «Արմենպրես»-ը տեղեկացավ Վարդենիսի համայնքապետարանի աշխատակազմից, համայնքի ղեկավար Ահարոն Խաչատրյանն ընդունել է Կոմիտաս Կարապետյանի անվան գեղարվեստի դպրոցի մրցանակակիր սաներին և նրանց ուսուցիչներին։ Առաջին հորիզանական զբաղեցրել են Շուշաննա Սահակյանը և Էլմիրա Մարտիրոսյանը, երկրորդ հորիզոնականը՝ Էլեն Գապոյանը և Մարի Խլոյանը, երրորդ հորիզոնականը՝ Մերի Սաֆարյանը։ 

Համայնքի ղեկավարը շնորհավորել է շնորհալի և արվեստասեր սաներին, պարգևատրել մասնագիտական հուշանվերներով, իսկ նրանց ուսուցիչներն արժանացել են դրամական խրախուսանքի։

Մանկական գեղարվեստի դպրոցի տնօրենը հաստատության անունից շնորհակալություն է հայտնել Ահարոն Խաչատրյանին` մշտապես դպրոցի մանկավարժների և սաների կողքին լինելու, նրանց աջակցելու համար։

Խոսրով  Խլղաթյան