ԳԱՎԱՌ, 19 ՀՈՒՆԻՍԻ, ԱՐՄԵՆՊՐԵՍ։ Գեղարքունիքի մարզի Վարդենիս համայնքում «Կամրջակ» սոցիալական և բարեգործական հասարակական կազմակերպության միջոցներով համայնքապետարանի հետ համագործակցությամբ բացվել է տարեցների խնամքի կենտրոն։
Ինչպես «Արմենպրես»-ը տեղեկացավ Վարդենիսի համայնքապետարանի աշխատակազմից, համայնքի տարեցները միմյանց հետ շփվելու, իրենց ժամանցն ու ազատ ժամանակն անցկացնելու վայր ունեն արդեն: Տարեցների ցերեկային խնամքի կենտրոնի բացումն առիթ է, որ նույն տարածքում ապրող, սակայն իրար վաղուց չհանդիպած մարդիկ շփվեն, նոր ծանոթություններ հաստատեն:
Տարեցների խնամքի կենտրոնի բացմանը ներկա են եղել Վարդենիսի համայնքի ղեկավար Ահարոն Խաչատրյանը, «Կամրջակ» ՍԲՀԿ նախագահ Մարիա Գորիսը, պաշտոնատար այլ անձինք։ Օրհնության կարգ է կատարել Հայ Առաքելական եկեղեցու Գեղարքունյաց թեմի Վարդենիսի տարածաշրջանի հոգևոր հովիվ տեր Հարություն քահանա Հունանյանը։
Համայնքի ղեկավար Ահարոն Խաչատրյանը ողջունել է ներկաներին և նշել, որ այս կենսական, մարդասիրական նշանակություն ունեցող ծրագիրն այսօր վերջապես կյանքի է կոչվում: «Վարդենիս համայնքի տարեցների ժամանցային ցերեկային կենտրոնում ստեղծվել է բարեկարգ և հարմարավետ միջավայր, առողջ մթնոլորտ՝ միմյանց հետ շփվելու և ժամանցը լիարժեք կազմակերպելու համար:
Սա ևս մեկ քայլ է՝ ուշադրություն դարձնելու տարեցների խնդիրներին և ջանքեր գործադրելու, որպեսզի նրանք ապրեն արժանավայել կյանքով, շրջապատված լինեն հոգատարությամբ»,-նշել է համայնքի ղեկավարը։
Հյուրընկալ կենտրոնում ցուցադրվել են Վարդենիս համայնքի արվեստասեր երեխաների գեղեցիկ կտավները։
«Ես հիմա թոշակի եմ անցել, չեմ աշխատում, բայց այս կենտրոնը ինձ համար շատ մեծ հորիզոն կբացի: Հիմա ես մեկուսացած եմ, չեմ շփվում շատերի հետ, բայց ինձ թվում է՝ այս կենտրոնի միջոցով ես շատ դրական լիցքեր կստանամ»,-նշել է կենտրոնի շահառու Ալվարդ Վարդանյանը:
Ազատ ժամանակն անցկացնելուց բացի ծերերը տեղում կստանան սնունդ և անհրաժեշտ խնամք:
Տարեցների ցերեկային կենտրոնի շենքի մի հատվածում համայնքապետարանը «Կամրջակ» կազմակերպության հետ համատեղ նախատեսում է նաև երեխաների և պատանիների համար զբաղվածության ու ժամանցի վայր ստեղծել։ Կենտրոնի գործունեությունն առաջիկա մեկ տարում կֆինանսավորի «Կամրջակ» սոցիալ-բարեգործական հասարակական կազմակերպությունը, այնուհետև աշխատանքների համակարգումը և ֆինանսավորումը կստանձնի Վարդենիսի համայնքապետարանը:
Խոսրով Խլղաթյան