Կոտայքի մարզպետն աննախադեպ է համարում մարզում իրականացվող շինարարության ծավալները

ԵՐԵՎԱՆ, 19 ՀՈՒՆԻՍԻ, ԱՐՄԵՆՊՐԵՍ: Կոտայքի մարզպետ Ահարոն Սահակյանն աննախադեպ է գնահատում մարզում վերջին երկու տարիներին իրականացված շինարարության ծավալները: 

«Արմենպրես»-ի թղթակցի հետ զրույցում Ահարոն Սահակյանը  մասնավորապես ուրախալի և աննախադեպ համարեց Հրազդան քաղաքում բազմաբնակարան շենքերի շինարարությունն ու Չարենցավանում  բազմաբնակարանի կառուցման համար ներկայացված հայտը, ինչն աննախադեպ է խորհրդային տարիներից հետո: 

«Եթե նախկինում միայն երևանամերձ  բնակավայրերում էր բազմաբնակարանների շինարարություն իրականացվում, ապա այսօր կառուցվում է նաև Հրազդանում: Հայտ ունենք Չարենցավանում բազմաբնակարան շենքի կառուցման համար, ինչը շատ ուրախալի է, որովհետև մեր մյուս բնակավայրերի համեմատ Չարենցավանը տնտեսապես ամենացածր ցուցանիշն ունի, բայց այսօր բազմաբնակարան շենքի կառուցման հայտ են ներկայացնում: Դա նշանակում է, որ մարզը զարգանում է նաև համաչափ»,-ասաց Սահակյանը՝ մանրամասնելով, որ Չարենցավանում, հնարավոր է, բազմաբնակարան շենքի շինարարությունը մեկնարկի այս տարի, իսկ մարզպետարանի կողմից արվում է հնարավորը, որպեսզի խոչընդոտներ չառաջանան: 

Մարզպետի համոզմամբ՝ բազմաբնակարան շենքերի շինարարության ծավալի աճին նպաստել է եկամտահարկի վերադարձի վերաբերյալ կառավարության աջակցության ծրագիրը: 

Անդրադառնալով մարզում արձանագրված տնտեսական ցուցանիշներին՝ Սահակյանը հավաստեց, որ աճ է գրանցվել գրեթե բոլոր ուղղություններով:  

Մասնավորապես՝ շինարարության ոլորտում աճն անցած տարի կազմել է գրեթե 26 տոկոս,  գյուղատնտեսությունում՝ 7 տոկոս, իսկ բնակչությանը մատուցված ծառայությունների ոլորտում՝ 31 տոկոս: 

Խոսելով գյուղատնտեսական  ձեռքբերումներից,՝ Սահակյանն ընդգծեց, որ Կոտայքն աչքի է ընկնում հատկապես այգեգործությամբ, իսկ վերջին տարիներին՝ ինտենսիվ այգիների զարգացմամբ:  

«Մարզի տարածքում ունենք շուրջ 4535 հեկտար այգիներ, որից 875 հեկտարն ինտենսիվ: Շուրջ 500 հեկտարի վրա ակտիվ տեմպով են զարգանում նոր տեխնոլոգիաներով՝ կաթիլային ոռոգմամբ, հակակարկտային ցանցով հիմնված այգիները: Մարզում այսօր ունենք նաև  շուրջ 143 հեկտար գործող ջերմոցներ, որոնց գերակշիռ մասն արտադրում է պտուղ-բանջարեղեն,24 հեկտարը՝ ելակ, 38 հեկտարը՝ ծաղիկ»,-ներկայացրեց մարզպետը:

Նրա խոսքով՝ ջերմոցային տնտեսությունների ընդլայնման ուղղությամբ աշխատանքները շարունակվում են և ընթացիկ տարում դրանք կընդլայնվեն: 

Սահակյանը գյուղատնտեսության զարգացման համար կարևորեց կառավարության կողմից իրականացվող աջակցությունը, որի շրջանակներում մարզում անցած տարի շուրջ 10 ծրագիր է գործել՝ ուղղված մասնավորապես ինտենսիվ այգիներին, փոքր և միջին խելացի անասնագոմերի կառուցմանը:

Բացի այդ՝ 2023 թվականին 1100-ից ավելի շահառու օգտվել է աշնանացանի սերմացուի սուբսիդավորման  ծրագրից: 

Մարզպետի գնահատմամբ՝ լուրջ ներդրումներ են կատարվել ոռոգման ցանցի ընդլայնման համար, ինչին զուգահեռ աճել է նաև մշակովի հողատարածքների ցուցանիշը: 

Ըստ Սահակյանի՝ մարզում հողագործության պոտենցիալն ահռելի է, քանի որ առայժմ մշակվում է  գյուղատնտեսական նշանակության հողերի շուրջ 50 տոկոսը:

Նրա համոզմամբ՝  նման տեմպերով ենթակառուցվածքների զարգացման ներդրումները շարունակելու պարագայում տարեցտարի կընդլայնվեն նաև մշակվող հողատարածքները: 

Խոսելով բնակչության զբաղվածության ապահովման մասին՝ Սահակյանը հայտնեց, որ այգիների հիմնման, ջերմոցների կառուցման արդյունքում մարզում շարունակաբար ավելանում են նաև աշխատատեղերը: Բացի այդ՝ տուրիզմի զարգացման շնորհիվ նոր աշխատատեղեր են ստեղծվում սպասարկման ոլորտում, իսկ շինարարության ծավալների աճը նույնպես  բավականին թվով մարդկանց զբաղվածության ապահովման հնարավորություն է ընձեռել:

Մարզպետն ուրախությամբ նշեց, որ անցած տարի նաև ծնունդների աճ է արձանագրվել, ցուցանիշը նախորդ տարվա համեմատ 115-ով ավելի է:  

Կոտայքի մարզպետի աշխատակազմի կողմից զգալի աշխատանքներ են իրականացվում Լեռնային Ղարաբաղից բռնի տեղահանված հայրենակիցների խնդիրների լուծման ուղղությամբ:

Սահակյանի ներկայացմամբ՝  մարզում այս պահի դրությամբ շուրջ 22 հազար ԼՂ-ից բռնի տեղահանված է տեղավորվել:

«Սկզբնական շրջանում, բնականաբար, շատ բարդ ու դժվար էր այդքան մարդկանց տեղավորելը,  տանիքով ապահովելը, տուն տրամադրելը: Սկզբի մեկ- երկու ամսվա ընթացքում մենք կարողացանք շուրջ 4000 մեր հայրենակիցների տեղավորել հյուրանոցներում, հանգստյան տներում, այն բոլոր վայրերում, որտեղ ապրելու նվազագույն պայմաններ կային: Այդ ընթացքում բոլորին ապահովել ենք տաք սննդով: Բոլոր ծախսերը, որոնք հասնում էին մի քանի միլիարդ դրամի,  հոգում էր կառավարությունը»,-ասաց մարզպետը՝ ավելացնելով, որ այնուհետև կառավարության  40+10 հազար դրամի չափով աջակցությունը մարդկանց հնարավորություն է տվել բնակարաններ վարձակալել, որի հարցում ևս մարզպետի աշխատակազմի կողմից աջակցություն է ցուցաբերվել: 

 ԼՂ-ից բռնի տեղահանված ընտանիքների բնակարանային ապահովման պետական աջակցության ծրագրի հաստատումից հետո Կոտայքի մարզպետի որոշմամբ ստեղծվել է աշխատանքային խումբ Լեռնային Ղարաբաղից բռնի տեղահանված ընտանիքների բնակարանային ապահովման պետական աջակցության ծրագիրը մարզում բնակվող հայրենակիցներին ներկայացնելու և ընթացակարգային հարցերին պարզաբանումներ տալու նպատակով:

Աշխատանքային խումբը ղեկավարում է մարզպետի տեղակալ Հայկ Մկրտչյանը, ում գլխավորությամբ արդեն իսկ իրազեկման աշխատանքներ են իրականացվել Հրազդան, Ծաղկաձոր, Չարենցավան խոշորացված համայնքներում:

Իրազեկման աշխատանքներին ներգրավված են նաև մարզպետի խորհրդականներ Ստեփան Բաղդասարյանը, Հայկ Ալեքսանյանը և Մհեր Գևորգյանը, ինչպես նաև մարզպետի աշխատակազմի ոլորտային պատասխանատուները:

Սահակյանի տեղեկատվությամբ՝ հանդիպումները պարբերական բնույթ են կրում, որի շրջանակներում նաև արձանագրվում են ԼՂ-ից բռնի տեղահանված անձանց բարձրաձայնած խնդիրները՝ փորձելով լուծում տալ դրանց:

Մարզպետի տեղեկատվությամբ՝ մեծ մասի խնդիրն աշխատանքով ապահովումն է: Մարզպետի աշխատակազմի ենթակայությամբ գործող հիմնարկներում արդեն ԼՂ-ից բռնի տեղահանված ավելի քան 200 անձ է աշխատանքի տեղավորվել, այդ թվում՝ դպրոցներում, հիվանդանոցներում: Մասնավոր հատվածի գործատուների հետ տարվող աշխատանքների շնորհիվ թափուր աշխատատեղերի առկայության դեպքում առաջնահերթությունը տրվում է ԼՂ-ից բռնի տեղահանված հայրենակիցներին: 

Ընդհանրացնելով Կոտայքի մարզում իրականացվող աշխատանքներն ու ձեռքբերումները՝  մարզպետ Ահարոն Սահակյանը կարևորեց 2024 թվականին նախատեսված դպրոցաշինության ծրագրերը: Այդ շրջանակներում մարզում շուրջ 16 դպրոց կկառուցվի:

«Համարում եմ, որ ամենակարևոր ոլորտն է կրթությունը, որովհետև մեր պետության վաղվա զարգացումը, հզորացումը, ուժեղացումը կապված է կրթության որակի հետ: Վատ պայմաններում ինչքան էլ որ բովանդակային առումով  կարող ես հասցնել աշակերտին լավ բովանդակությամբ կրթություն, միևնույնն է՝ լիարժեք չի լինի:Համարում եմ, որ բարեկեցիկ ու ավելի հարմարավետ պայմաններում կրթություն ստացած աշակերտը վաղն ավելի շատ է իր երկիրը սիրելու»,-համոզմունք հայտնեց նա: