Խաղաղության շրջիկ դպրոցի կանգառը Հայաստանն է. Ֆրանսիայի նախկին վարչապետը թեմայի շուրջ ՀՖՀՀ-ում հանդես եկավ դասախոսությամբ
6 րոպեի ընթերցում
![Խաղաղության շրջիկ դպրոցի կանգառը Հայաստանն է. Ֆրանսիայի նախկին վարչապետը թեմայի շուրջ ՀՖՀՀ-ում հանդես եկավ դասախոսությամբ](http://armenpress.am/resized/480/storage/images/articles/2024/06/12/qvLDHvbshPPCUfKpo4zJ69nn7v1iYALzNUORa1PT.webp)
ԵՐԵՎԱՆ, 12 ՀՈՒՆԻՍԻ, ԱՐՄԵՆՊՐԵՍ։ Երիտասարդներին հակամարտությունների կարգավորման մեթոդները սովորեցնելու, խաղաղության և ժողովրդավարության արժեքներին հաղորդակից դարձնելու նպատակով Խաղաղության շրջիկ դպրոցը Երևանում է` Հայաստանի ֆրանսիական համալսարանում (ՀՖՀՀ):
«Արմենպրես»-ի հաղորդմամբ՝«Առաջնորդները հանուն խաղաղության» նախաձեռնության հետ համագործակցությամբ կազմակերպված այս դպրոցի եռօրյա դասախոսության շրջանակում որպես հիմնական բանախոս բացման խոսքով հանդես եկավ Ֆրանսիայի նախկին վարչապետ, «Առաջնորդները հանուն խաղաղության» նախաձեռնության նախագահ Ժան-Պիեր Ռաֆարենը:
ԿԳՄՍ նախարարի տեղակալ Արթուր Մարտիրոսյանն իր ելույթում նշեց, որ Հայաստանում այսօր հյուրընկալում են խաղաղության շրջիկ եռօրյա դպրոցին, որը կազմակերպվել է «Առաջնորդներ հանուն խաղաղության» կազմակերպության կողմից, որը գլխավորում է Ֆրանսիայի նախկին վարչապետը:
«Սա մեզ համար խորհրդանշական է, որովհետև իրոք խաղաղության գինն ավելի քան ակնհայտ է: Կարծում եմ, որ երիտասարդները՝ հատկապես վաղվա որոշում կայացնողները, կարիք ունեն ձեռք բերելու գիտելիքներ այս ուղղությամբ: Սա շատ լավ հնարավորություն է հաղորդակցվելու աշխարհում կարևոր դիրք ունեցող շատ մասնագետների հետ, յուրացնելու նրանց գիտելիքն ու փորձը: Շատ կարևոր է խաղաղության մասին համապարփակ գիտելիքներ ունենալ, իմանալ՝ ինչպես կարելի է կառավարել ճգնաժամերը, կառավարել հակամարտությունները»,- ասաց փոխնախարարը։
Բացման արարողությանը ներկան էր նաև Հայաստանում Ֆրանսիայի արտակարգ և լիազոր դեսպան Օլիվիե Դըկոտինյին, որն իր խոսքում ընդգծեց՝ Հայաստանում խաղաղությունը իրենց բոլորի մտահոգությունն է:
«Այն կարող է հեռավոր և անորոշ թվալ և այդպիսին է որոշ առումներով, այնուհանդերձ, խաղաղությունը շնորհ չէ, այլ աշխատանքի և մշակույթի արդյունք: Հանուն խաղաղության պետք է աշխատանքներ տարվեն ու մշակվեն։ Ֆրանսիայի հարաբերությունը Հայաստանի հետ հենց այս ոգու վրա է կազմակերպված, այսինքն՝ մի կողմից Ֆրանսիան աջակցում է Հայաստանի պաշտպանական համակարգին, որպեսզի երկիրը կարողանա պաշտպանել իր ինքնիշխանությունն ու իր ժողովրդին, մյուս կողմից մշակութային և ինտելեկտուալ առումով մենք փորձում ենք աջակցել մեր հայ բարեկամներին խաղաղության որոնումներում: Լիահույս եմ, որ սա առիթ կլինի, որպեսզի ապագա առաջնորդ երիտասարդները խաղաղության առաջնորդներ լինեն»,- ներկայացրեց դեսպանը:
Ֆրանսիայի նախկին վարչապետ, «Առաջնորդները հանուն խաղաղության» նախաձեռնության նախագահ Ժան-Պիեր Ռաֆարենը շնորհակալություն հայտնեց Հայաստանում ֆրանսիական համալսարանին՝ Խաղաղության շրջիկ դպրոցին իր հարկի տակ ընդունելու համար: «Մենք պետք է միասին խորհենք, թե ինչպես պետք է կարողանանք հարցերը լուծել, որովհետև նորից լինում են պատերազմներ, որոնք տարածվում են: Ստեղծել ենք մի շարք մասնագետներից բաղկացած խումբ, որը պարտավորվեց մնալ սեղանի շուրջ՝ համատեղ հասկանալու, թե ինչ է տեղի ունենում: Գուցե, մեր փորձը կարողանա օգնել գտնել խելամիտ լուծումներ՝ խաղաղության հասնելու համար: Ես պատիվ ունեմ նախագահել այս կազմակերպությունը: Մենք ունենք մի շարք առաջնորդներ տարբեր երկրներից՝ Չինաստանից, ԱՄՆ-ից, Իրանից։ Բոլորս անում ենք այնպես, որ խոսենք՝ հասկանալու, թե ինչպես ենք կերտելու մեր խաղաղ ապագան: Հարկ է նշել նաև, որ մենք ամեն տարի նախաստեսում ենք որոշ պարգևատրումներ տարբեր կազմակերպությունների, օրինակ՝ մանկապարտեզների համար՝ փորձելով առաջ քաշել խաղաղության միտումը»,- ասաց Ռաֆարեն:
Նա արձանագրեց՝ այսօր բռնությունն ամենուր է և այն ավելանում է, ինչը հանգեցնում է հասարակության քայքայման: Պատերազմները, կոնֆլիկտները այսօր ամենուր են, փոխզիջման տարբերակը չի էլ դիտարկվում: Հենց սրա համար էլ կարևոր է հասկանալ՝ ինչպես կառուցել խաղաղության մշակույթը և ոգին:
ՀՖՀՀ ռեկտոր Սալվա Նակուզին շնորհակալություն հայտնեց բանախոսներին և մատնանշեց, որ եռօրյա դպրոցի շրջանակում ուսանողները հնարավորություն կունենան մտածելու գլոբալ մարտահրավերների մասին՝ մի կողմ դնելով հուզական կողմը։
Հունիսի 12-14-ը դպրոցի շրջանակում ելույթ կունենան նաև անվանի միջազգային փորձագետներ, ինչպիսիք են՝ քաղաքագիտության պրոֆեսոր Բերտրան Բադին, Geneva Call-ի հիմնադիր Էլիզաբեթ Դեկրե- Ուորները, Ֆրեդերիկ էսպոսիտոն, Սևան Գարիբյանը, Կեվան Փիրամը Գրեգորի Կոննորը: Վերջիններս կխոսեն գլոբալ կառավարման, կլիմայական փոփոխությունների և արհեստական բանականության, ինչպես նաև միջնորդության և խաղաղության կառուցման մասին։
Հայաստանում ֆրանսիական համալսարանը (ՀՖՀՀ) Հայաստանի առաջատար բարձրագույն ուսումնական հաստատություններից մեկն է։ ՀՖՀՀ-ն շնորհում է երկու պետական դիպլոմ` հայկական և ֆրանսիական (եվրոպական) Համալսարանի ակադեմիական գործընկերներն են Ժան Մուլեն Լիոն 3 համալսարանը և Թուլուզ 5 Պոլ Սաբատիե համալսարանը: ՀՖՀՀ-ն ներկայումս ունի ավելի քան 2100 ուսանող և շուրջ 2900 շրջանավարտ: ՀՖՀՀ-ի հաջողության վկայականն է շրջանավարտների աշխատանքի տեղավորման ցուցանիշը: Ըստ 2022թ.-ի շրջանավարտների շրջանում անցկացված հարցման` վերջիններիս ընդամենը 1%-ն է գտնվում աշխատանքի որոնման ակտիվ փուլում: