Podcast. Այլընտրանքային կրթություն, ուսուցման 4 ուղղություն Catalyst Academy-ում. կատալիստները՝ դրական փոփոխություն բերող առաջնորդ պատանիներ
3 րոպեի ընթերցում
Այլընտրանքային կրթություն, ուսուցման 4 ուղղություն և բազում հեռանկարներ. Կատալիստ ակադեմիայի հիմնադիր տնօրեն Արտակ Խաչատրյանը և 14-ամյա կատալիստ Ռուբեն Խուրշուդյանը «Արմենպրես» Podcast-ում ներկայացրին ակադեմիայի հնարավորությունները, հեռանկարներն ու նպատակները:
«Կատալիստն այն ուժեղ անհատն է, ով դրական փոփոխություններ է մտցնում իր անձնական և մասնագիտական կյանքում և աշխարհը դարձնում է ավելի լավը»,- Podcast-ի հենց սկզբում ներկայացրեց Խաչատրյանը՝ նշելով, որ սա ամենատարածված հարցն է, որն իրեն ուղղում են։
Ուսանողակենտրոն կրթական ծրագիրը, որը կազմվել է փորձառության, սովորողների տարիքային խմբի կարիքների ու նախասիրությունների, նաև Կանադայի և ԱՄՆ-ի միջազգային փորձի հիման վրա, ձևակերպված է ԱԲԱԱ հապավումով։ Կրթական ծրագիրը 4 ուղղությունն ունի։
«Առաջին Ա-ն՝ անձնային աճն է՝ պատանիների փափուկ հմտությունների զարգացումը, ինչպիսիք են ժամանակի կառավարումը, քննադատական մտածողությունը, ստեղծարարությունը, հուզական ինտելեկտը, հաղորդակցության հմտությունները։ Այս ուղղության նպատակը պատանիներին որպես ուժեղ անհատներ ձևավորելն ու կայացնելն է։
Հաջորդը բիզնեսը և կարիերան է։ Պատանիներն ուսումնասիրում են, օրինակ, մարքեթինգ, ֆինանսներ, արտադրանքի ձևավորում, զարգացում, գաղափարների գեներացում։ Սա մեր ակադեմիայի ծրագրի շրջանակում առանցքային տեղ է գրավում, որովհետև պատանիներն ամբողջովին պատկերացնում են, թե ինչպես կարելի է զրոյից ստեղծել գաղափար, զարգացնել, մշակել և ներկայացնել հանրությանը։
Երրորդն արդի աշխարհի փորձն է, այսինքն՝ ժամանակակից տեխնոլոգիաները, ինչպիսիք են ծրագրավորման ուղղությունները, արհեստական բանականությունը, մեքենայական ուսուցումը, բլոքչեյն տեխնոլոգիաները և այլն։
Չորրորդն արժեհամակարգի ձևավորումն է։ Մենք դա անում ենք մեր ուսումնասիրած յուրաքանչյուր թեմայի շրջանակում։ Կատալիստն այն ուժեղ անհատն է, ով դրական փոփոխություններ է մտցնում իր անձնական և մասնագիտական կյանքում և աշխարհը դարձնում է ավելի լավը։ Նույնիսկ այն բիզնես պրոդուկտները, որ ստեղծվում են, պետք է բոլորին բարիք բերեն»,- ծանոթացրեց ակադեմիայի հիմնադիր տնօրեն Արտակ Խաչատրյանը։
Հիմնադիրը նշեց՝ այս պահին աշխատում են Կատալիստ ակադեմիան հասցնել նաև մարզեր։
Իսկ թե ովքեր կարող են դառնալ կատալիստ, ինչպես ընդունվել ակադեմիա, ինչպես և ինչքան սովորել, լսեք ամբողջական Podcast-ում: