ԱԳ նախարար Միրզոյանը Քուլս Մարկին է ներկայացրել Հարավային Կովկասում հարատև խաղաղության հասնելու Հայաստանի տեսլականը

ԵՐԵՎԱՆ, 18 ՄԱՅԻՍԻ, ԱՐՄԵՆՊՐԵՍ: Ստրասբուրգ կատարած այցի շրջանակներում մայիսի 17-ին ՀՀ ԱԳ նախարար Արարատ Միրզոյանը հանդիպում է ունեցել Եվրոպայի խորհրդի տեղական և տարածքային իշխանությունների կոնգրեսի նախագահ Քուլս Մարկի հետ:

«Արմենպրես»-ի փոխանցմամբ՝ այս մասին հայտնում են ՀՀ ԱԳ նախարարությունից։

Զրուցակիցներն անդրադարձել են կատարել Հայաստան-Եվրոպայի խորհուրդ 2023-2026 թվականների Գործողությունների ծրագրի իրականացման ընթացքին և մարդու իրավունքների պաշտպանության ոլորտում ձեռքբերումներին:

Նախարար Միրզոյանը շեշտել է, որ Հայաստանի կառավարության համար բացարձակ առաջնահերթություն է երկրում ժողովրդավարական բարեփոխումների, օրենքի գերակայության և մարդու իրավունքների ոլորտներում բարեփոխումների օրակարգի շարունակական կյանքի կոչումը: Այս համատեքստում նախարար Միրզոյանն ընդգծել է ԵԽ գործիքակազմի արդյունավետ կիրառումը:

Արարատ Միրզոյանը և Քուլս Մարկը քննարկել են նաև տեղական ինքնակառավարման մարմինների մակարդակում համագործակցությանն առնչվող հարցեր:

Մտքեր են փոխանակվել նաև տարածաշրջանային զարգացումների վերաբերյալ: Նախարար Միրզոյանը զրուցակցին ներկայացրել է Հարավային Կովկասում հարատև խաղաղության հասնելու Հայաստանի տեսլականը և Ադրբեջանի հետ հարաբերությունների կարգավորման գործընթացում առանցքային հարցերի շուրջ ՀՀ դիրքորոշումները: