«Երիտասարդի երազանք» նախագծի վերջին խմբի մասնակիցները ներկայացրին իրենց մարքեթինգային ծրագրերը

«Իմ Քայլը» բարեգործական հիմնադրամի «Երիտասարդի երազանք» նախագծի վերջին խմբի 18 մասնակիցներն ապրիլի 23-ին ներկայացրել են իրենց մարքեթինգային ծրագրերը հիմնադրամի թիմին, որի անդամները, լսելով բիզնես գաղափարներն ու մարքեթինգային պլանները, կիսվել  են իրենց խորհուրդներով և օգնել կատարել վերջին շտկումները։ 

Ինչպես «Արմենպրես»-ին տեղեկացրին հիմնադրամից, նշված խումբը կազմված է այն երիտասարդներից, ովքեր հասանելիության խնդիրներով պայմանավորված ֆիզիկապես չեն կարողացել մասնակցել դասընթացներին, բայց ձգտումը հաղթահարել է բոլոր դժվարությունները, և դասընթացներին մասնակցել են առցանց տարբերակով:

Մասնակիցները շաբաթներ անց իրենց գործարար ծրագրերը կներկայացնեն հատուկ կազմված հանձնաժողովին։ Հենց այդ հանդիպման արդյունքում էլ կորոշվի՝ ովքե՞ր են ստանում դրամաշնորհ և իրական հնարավորություն՝  իրենց երազանքները գործող բիզնեսի վերածելու համար։

«Այսօրվա հանձնաժողովը ուրախ էր արձանագրել, որ բիզնես գաղափարների շրջանակը լայն էր՝ մեղվապահությունից և ծնեբեկի արտադրությունից մինչև գինու համտեսի սրահներ, հյուրատներ ու սրճարաններ։ Ստորև այն ոլորտներն են, որոնց շուրջ ձևավորվել էին մասնակիցների գործարար ծրագրերը․

• մեղվապահություն
• ծնեբեկի արտադրություն
• գինու համտեսի սրահ
• գդալով դոզավորված մեղրի արտադրություն
• հյուրատուն և սննդի կազմակերպում
• անվտանգության և տեսահսկման համակարգեր
• հացաբուլկեղենի արտադրություն
• սրճարանային գործունեություն և այլն»,- ասվում է հաղորդագրության մեջ։

«Հաջողակից՝ սկսնակին» ծրագիրը «Իմ Քայլը» հիմնադրամի կարևոր նախաձեռնություններից է, որը նպատակ ունի խթանել փոքր բիզնեսի զարգացումը և ձևավորել բարեգործության նոր մշակույթ, որտեղ կայացած գործարարները ներդրում են կատարում սկսնակ ձեռնարկատերերի զարգացման գործում։