Հայաստանի Հանրապետության Սահմանադրության հետ կապված բոլոր հանրաքվեները կեղծվել են․ վարչապետ
2 րոպեի ընթերցում
ԵՐԵՎԱՆ, 7 ՄԱՅԻՍԻ, ԱՐՄԵՆՊՐԵՍ։ Հայաստանի Հանրապետության Սահմանադրության հարցը Հայաստանի Հանրապետության ներքին հարցն է։ «Արմենպրես»-ի հաղորդմամբ՝ հրավիրված մամուլի ասուլիսի ժամանակ այս մասին ասաց վարչապետ Նիկոլ Փաշինյանը։
«Հայաստանի Հանրապետության Սահմանադրությունն արտաքին որևէ պարտավորության իրականացմանը չի խոչընդոտում և խաղաղության պայմանագրի մեջ արդեն իսկ համաձայնեցված հոդված ունենք, որ կողմերից ոչ մեկը չի կարող հղում անել իր օրենսդրությանը տվյալ պայմանագրից բխող պարտավորությունները չկատարելու համար»,- նշեց վարչապետը։
Նրա խոսքով՝ նոր Սահմանադրության օրակարգի ձևավորման նպատակն է ժողովրդական համաձայնեցումը անցած իրավունքի վրա հիմնված արդարադատությունն է։
«Այսօր ֆունդամենտալ խնդրի հետ առնչվում եմ որպես վարչապետ։ Ես տեսնում եմ, որ Հայաստանի Հանրապետության իրավակարգը ժողովուրդն ընկալում է ինչ-որ մի օտար բան, որովհետև ժողովուրդը չունի զգացողություն, որ Հայաստանի Հանրապետությունում ապրելու կանոններն ինքն է իր համար որոշել։ Ինքն ունի զգացողություն, որ ուրիշներն են իր համար որոշել, թե ինքը ինչ կանոններով պետք է ապրի Հայաստանի Հանրապետությունում։ Եվ ես երկար մտածել եմ այս ուղղությամբ և եկել եզրակացության, որ ժողովրդի խորը ընկալմամբ Հայաստանի Հանրապետության սահմանադրության հետ կապված բոլոր հանրաքվեները կեղծվել են։ Ինքը կողմ չի քվեարկել այդ սահմանադրությանը, ինքը օրգանական կապ չունի այդ սահմանադրության հետ և հետևաբար այդ օտարությունը առաջանում է այդ տեղից»,-եզրափակեց Փաշինյանը։