Բրյուսելում վերահաստատեցի Հայաստանին աջակցելու ԱՄՆ-ի հանձնառությունը․ Սամանթա Փաուեր

ԵՐԵՎԱՆ, 10 ԱՊՐԻԼԻ, ԱՐՄԵՆՊՐԵՍ։ Ամերիկայի Միացյալ Նահանգների Միջազգային զարգացման գործակալության ղեկավար Սամանթա Փաուերը հայտարարել է, որ ապրիլի 5-ին Բրյուսելում հայկական պատվիրակության հետ հանդիպման ժամանակ վերահաստատել է Հայաստանին աջակցելու ԱՄՆ-ի հանձնառությունը։

«Արմենպրես»-ի հաղորդմամբ՝ այս մասին նա գրառում է կատարել X-ի իր միկրոբլոգում։

«Անցյալ շաբաթ Բրյուսելում վերահաստատեցի Միացյալ Նահանգների հանձնառությունը ՝ աջակցելու Հայաստանին ժողովրդավարական բարեփոխումների խորացմանը, տնտեսության ընդլայնմանը և պայծառ ապագա կառուցելու ձգտումներին»,- ասվում է գրառման մեջ։

Սամանթա Փաուերը նաև գրառմանը կից տեսանյութ է հրապարակել, որում հայտարարել է, որ 2022 թվականից սկսած՝ ԱՄՆ ՄԶԳ-ն կրկնապատկել է ներդրումները Հայաստանի տնտեսության մեջ։

«Դա ներառել է կանանց և երիտասարդների վերապատրաստում՝ նոր տնտեսության պայմաններում նրանց ավելի մրցունակ դարձնելու նպատակով։ Դա ներառել է աշխատանք Հայաստանի կառավարության հետ ներդրումային միջավայրը բարելավելու նպատակով նոր կարգավորումներ ընդունելու, արտահանումն ու ներմուծումն ավելացնելու համար։ Այս ամենը տվել են իրենց արդյունքները, և մենք տեսնում ենք Միացյալ Նահանգների և Հայաստանի միջև առևտրի աճը, որն անցած տարի փաստացի կազմել է 17 տոկոս։ Ես հնարավորություն ունեցա վարչապետ Փաշինյանին հայտնելու, որ ԱՄՆ Միջազգային զարգացման գործակալությունը պատրաստվում է 33 միլիոն դոլարի հավելյալ ներդրում անել այս կարևոր առաջընթացը զարգացնելու համար։ Ամերիկայի Միացյալ Նահանգները, ԱՄՆ Միջազգային զարգացման գործակալությունը, ԱՄՆ-ի ժողովուրդը, մենք բոլորս վճռական ենք Հայաստանին օգնելու հարցում՝ ցույց տալու, որ ժողովրդավարությունը իսկապես արդյունք է տալիս»,- ասել է Փաուերը։

Հայաստանի Հանրապետության վարչապետ Նիկոլ Փաշինյանն ապրիլի 5-ին Բրյուսելում հանդիպել էր ԱՄՆ Միջազգային զարգացման գործակալության ղեկավար Սամանթա Փաուերի հետ:

Last week in Brussels, I reaffirmed the United States’ commitment to support Armenia as they deepen their democratic reforms, expand their economy, and build towards a bright future. pic.twitter.com/Ir6ZWNWpUP

— Samantha Power (@PowerUSAID) April 10, 2024