Վարչապետը հայտնեց, թե որ դեպքում Հայաստանը փոխադարձաբար հետ կկանչի Ադրբեջանի դեմ միջպետական գանգատները
2 րոպեի ընթերցում
ԵՐԵՎԱՆ, 20 ՄԱՐՏԻ, ԱՐՄԵՆՊՐԵՍ։ Վարչապետ Նիկոլ Փաշինյանը հայտնեց, թե որ դեպքում Հայաստանը փոխադարձաբար հետ կկանչի Ադրբեջանի դեմ միջազգային ատյաններում ներկայացրած միջպետական գանգատները։ Ինչպես տեղեկացնում է «Արմենպրես»-ը, Ազգային ժողովում կառավարության անդամների հետ հարց ու պատասխանի ժամանակ վարչապետը նշեց, որ պատրաստ են փոխադարձաբար հետ կանչել միջազգային ատյաններից գանգատները, եթե հայկական կողմը համոզված լինի, որ հաստատվում է կայուն և տևական խաղաղություն։
«Մենք ասել ենք, որ եթե խաղաղության պայմանագիրը ամբողջությամբ պատրաստ լինի ստորագրելու և Հայաստանի Հանրապետությունը համարի, որ ինքը կարող է ստորագրել այս պայմանագիրը և լինի այդպիսի թեմա, որ եկեք փոխադարձաբար միջազգային ատյաններից հետ կանչենք դատարական գործերը՝ դա քննարկելի և կարող է նույնիսկ տրամաբանական լինել։
Եթե մենք տեսնենք, որ հաստատվում է կայուն և տևական խաղաղություն և կայուն և տևական խաղաղությանը վերջին շտրիխն է մնացել լրացնելու, կարող ենք գնալ այդ քայլին։ Եթե տեսնենք, որ չէ չի ստացվում կայուն և տևական խաղաղություն, մենք պարզ է, որ այդ գործիքից չենք հրաժարվի»,- ասաց Փաշինյանը՝ հավելելով, որ այդ հարցով դեռ որևէ որոշում չի կայացվել։
Ավելի վաղ, վարչապետ Նիկոլ Փաշինյանը հայտարարել էր, որ Հայաստան-Ադրբեջան բանակցությունների ընթացքում քննարկվել է և քննարկվում է միջազգային ատյաններում երկուստեք միջպետական գանգատներից հրաժարվելու հարցը։ Նա չի բացառել միջազգային ատյաններում ընդդեմ Ադրբեջանի գանգատներից հրաժարվելու հնարավորությունը։
