ՋԵՐՄՈՒԿ, 7 ՓԵՏՐՎԱՐԻ, ԱՐՄԵՆՊՐԵՍ։ Առողջարանային Ջերմուկը գրավիչ է տարվա չորս եղանակին էլ: Չնայած այս ձմռան առատ տեղումներին, արտերկրից Հայաստան ժամանած զբոսաշրջիկներն այցելել են նաև Ջերմուկ: Զբոսաշրջիկները, հատկապես տաք երկրներից, Ջերմուկ են այցելում ոչ միայն քաղաքում գործող առողջարանների մատուցած բուժական ավելի քան 30 ծառայություններից օգտվելու համար, այլև վայելելու քաղաքի առատ ձյունը։ «Հիդրոօդերևութաբանության և մոնիթորինգի կենտրոնի» տվյալներով՝ բնակավայրերից ամենաբարձր ձյան ծածկը հունվար ամսին եղել է Ջերմուկում՝ 93-95 սմ։
Ջերմուկը մարդաշատ է եղել հատկապես նախատոնական ու տոնական օրերին: «Արմենպրես»-ի թղթակցի հետ զրույցում առողջարաններից մեկի աշխատակիցն ասաց, որ այդ օրերին աշխատել են ամբողջ զբաղվածությամբ: Վիճակագրական տվյալներով՝ Ամանորի տոնական օրերին Ջերմուկն ունեցել է 3 հազարից ավելի հյուր:
Չնայած առատ ձյանն ու ցրտին, առողջարանային քաղաքում իրենց արձակուրդը, հանգիստն ու բուժումն են անցկացնում նաև Հայաստանի տարբեր վայրերից այցելած հյուրերը:
Ջերմուկում հյուրանոցների, հյուրատների և առողջարանների գները տոնական օրերին չեն փոխվել՝ 5-6 հազար դրամից մինչև 60 հազար դրամ 1 կամ 2 անձի համար՝ 1 գիշերը։ Որոշ հյուրանոցներում կամ առողջարաններում գնի մեջ ներառված են երեքանգամյա սնունդն ու բուժական ծառայությունները։
Ջերմուկը ջրաբուժական կուրորտային քաղաք է՝ հայտնի հանքային ջրերով, ու հետևաբար, այստեղ գալիս են հիմնականում աղեստամոքսային ու շնչառական խնդիրներ ունեցողները: Քաղաքի հանքային ջրերի Ըմպելասրահում հյուրերը, զբոսաշրջիկները կարող են օգտվել 30-55 աստիճան ջերմությամբ հոսող բնական հանքային ջրից։
Լիլիթ Վերդյան
Լուսանկարները՝ Մխիթար Խաչատրյանի