Նիկոս Խրիստոդուլիդիսը հայտարարել է, որ Կիպրոսը սատարում է Հայաստանի նախաձեռնած «Խաղաղության խաչմերուկ»-ին
2 րոպեի ընթերցում
ԵՐԵՎԱՆ, 25 ՀՈՒՆՎԱՐԻ, ԱՐՄԵՆՊՐԵՍ: Կիպրոսի նախագահ Նիկոս Խրիստոդուլիդիսը Եվրոպայի խորհրդի խորհրդարանական վեհաժողովում ԱԺ պատգամավոր Սոնա Ղազարյանի հարցին ի պատասխան հայտարարել է, որ Կիպրոսը սատարում է Հայաստանի Հանրապետության նախաձեռնած «Խաղաղության խաչմերուկ» նախագծին:
«Արմենպրես»-ի փոխանցմամբ՝ այս մասին հայտնում են Հայաստանի ազգային ժողովից:
Խորհրդարանից տեղեկացնում են, որ հունվարի 21-27-ը Ստրասբուրգում ընթացող Եվրոպայի խորհրդի խորհրդարանական վեհաժողովի տարեկան նստաշրջանի առաջին մասի աշխատանքներին մասնակցում է ԵԽԽՎ-ում ՀՀ ԱԺ պատվիրակությունը: Նստաշրջանի լիագումար նիստում ԱԺ պատվիրակության անդամ Սոնա Ղազարյանը հարց է ուղղել Կիպրոսի նախագահ Նիկոս Խրիստոդուլիդիսին:
«Ձերդ գերազանցություն,
Պատիվ է ողջունել Ձեզ այս վեհաժողովում:
Վերջերս Հայաստանի կառավարությունը հանդես եկավ «Խաղաղության խաչմերուկի» նախաձեռնությամբ, որը վերաբերում է ենթակառուցվածքների ապաշրջափակմանը եւ տարածաշրջանում փոխկապակցվածության բարձրացմանը: Այս նախագիծը մեծապես կնպաստի մեր տարածաշրջանի եւ նրա սահմաններից դուրս գտնվող ժողովուրդների միջեւ համագործակցությանն ու կայուն խաղաղությանը:
Պարոն նախագահ, ինչպե՞ս է Կիպրոսը վերաբերում այս նախագծին:
Շնորհակալություն»:
«Կիպրոսը սատարում է Հայաստանի Հանրապետության կողմից նախաձեռնած «Խաղաղության խաչմերուկ» նախագիծը»,- հայտարարել է նախագահ Նիկոս Խրիստոդուլիդիսը՝ հավելելով, որ իրենք աջակցում են ցանկացած ջանքի, որը ներառում է երկրների միջեւ համագործակցություն: