Հայաստանը հրատարակության է ուղարկել «Խաղաղության խաչմերուկ»-ը. այդ նախագիծը կուղարկվի նաև միջազգային գործընկերներին
2 րոպեի ընթերցում
![Հայաստանը հրատարակության է ուղարկել «Խաղաղության խաչմերուկ»-ը. այդ նախագիծը կուղարկվի նաև միջազգային գործընկերներին](http://armenpress.am/resized/480/static/news/b/2023/10/1122796.jpg)
ԵՐԵՎԱՆ, 25 ՀՈԿՏԵՄԲԵՐԻ, ԱՐՄԵՆՊՐԵՍ: Հայաստանի կառավարությունը հրատարակության է ուղարկել «Խաղաղության խաչմերուկ» նախագիծը, որում արտահայտված են տարածաշրջանային հաղորդակցությունների բացման պատկերացումները, այն պատրաստ կլինի հոկտեմբերի 25-ի երեկոյան:
«Արմենպրես»-ի հաղորդմամբ՝ այս մասին հայտնեց Հայաստանի վարչապետ Նիկոլ Փաշինյանն Ազգային ժողովում կառավարության անդամների հետ հարցուպատասխանին:
«Հենց հիմա մենք հրատարակության ենք ուղարկել անգլալեզու նյութ, բրոշյուր, որը կոչվում է «Խաղաղության խաչմերուկ», որտեղ արտահայտված են մեր պատկերացումները տարածաշրջանային կոմունիկացիաների բացման և «Խաղաղության խաչմերուկ»-ի հայեցակարգի մասին»,-ասաց վարչապետը:
Դրանում ներկայացվում են հնարավոր երթուղիները, առաջարկները:
«Դա մենք ընկալում ենք որպես տարածաշրջանային նախագիծ և պատրաստվում ենք այդ նախագիծն ուղարկել նաև միջազգային մի շարք գործընկերների՝ ակնկալելով նրանց արձագանքը»,-ասաց Փաշինյանը:
Վարչապետը հավելեց՝ նախագիծը մի փոքր վերաձևակերպել են: Այս նախագիծն արդեն ունի տարբերանշան: Սա արվում է նրա համար, որ հանրությանը հնարավորինս հասանելի լինի: Այսօր՝ հոկտեմբերի 25-ի երեկոյան արդեն տպագիր նյութը հասանելի կլինի: