Գրիգորյանն ու Կլաարը քննարկել են Բրյուսելում նախատեսվող Փաշինյան-Ալիև-Միշել հանդիպման նախապատրաստական աշխատանքները
1 րոպեի ընթերցում
![Գրիգորյանն ու Կլաարը քննարկել են Բրյուսելում նախատեսվող Փաշինյան-Ալիև-Միշել հանդիպման նախապատրաստական աշխատանքները](http://armenpress.am/resized/480/static/news/b/2023/10/1121834.jpg)
ԵՐԵՎԱՆ, 12 ՀՈԿՏԵՄԲԵՐԻ, ԱՐՄԵՆՊՐԵՍ։ Հայաստանի Հանրապետության անվտանգության խորհրդի քարտուղար Արմեն Գրիգորյանը Տոյվո Կլաարի հետ հանդիպմանն անդրադարձել է տարածաշրջանի անվտանգության խնդիրներին և կայունության պահպանմանն առնչվող հարցերին: «Արմենպրես»-ի փոխանցմամբ՝ Արմեն Գրիգորյանը հանդիպման մասին տեղեկացրել է «Ֆեյսբուք» սոցիալական ցանցի իր էջում կատարած գրառման միջոցով:
«Հոկտեմբերի 12-ին ընդունել եմ Հարավային Կովկասի և Վրաստանի ճգնաժամի հարցերով ԵՄ հատուկ ներկայացուցիչ Տոյվո Կլաարին։
Հանդիպման ընթացքում անդրադարձել ենք տարածաշրջանի անվտանգային խնդիրներին և կայունության պահպանմանն առնչվող հարցերին: Քննարկել ենք Բրյուսելում նախատեսվող եռակողմ հանդիպման նախապատրաստական աշխատանքները»,- նշված է գրառման մեջ:
Հոկտեմբերի վերջին Բրյուսելում նախատեսվում է Հայաստանի վարչապետի և Ադրբեջանի նախագահի հանդիպումը՝ ԵՄ խորհրդի նախագահ Շառլ Միշելի միջնորդությամբ: