Ֆրանսիայի ԱԳ նախարարը պատրաստակամություն է հայտնել արտակարգ օգնություն ուղարկել Լեռնային Ղարաբաղում պայթյունից տուժածներին

ԵՐԵՎԱՆ, 26 ՍԵՊՏԵՄԲԵՐԻ, ԱՐՄԵՆՊՐԵՍ։ Ֆրանսիայի արտգործնախարար Կատրին Կոլոննան Ադրբեջանին կոչ է արել անհապաղ թույլ տալ հումանիտար օգնության մուտքը Լեռնային Ղարաբաղում պայթյունից տուժածներին։

«Իմ բոլոր մտքերը երեկոյան վառելիքի պահեստում տեղի ունեցած պայթյունից տուժածների հետ են։ Ֆրանսիան պատրաստ է արտակարգ ռեսուրսներ ուղարկել։ Ադրբեջանը պետք է անմիջապես թույլ տա հումանիտար օգնության մուտքը», - գրել է Կոլոննան։

#Haut-Karabagh | Toutes mes pensées vont aux victimes de l'explosion d'un dépôt de carburant ce soir. La France se tient prête à envoyer des moyens d’urgence. L’Azerbaidjan doit permettre l'accès immédiat de l’aide humanitaire.

— Catherine Colonna (@MinColonna) September 25, 2023

Ստեփանակերտ-Ասկերան ավտոճանապարհի հարակից տարածքում` բենզինի պահեստում սեպտեմբերի 25-ին տեղի ունեցած պայթյունի հետևանքով վիրավորների թիվն անցնում է 200-ը: Մեծամասնության առողջական վիճակը ծանր է կամ ծայրահեղ ծանր։ ՀՀ առողջապահության նախարարության Տեղեկատվության և հասարակայնության հետ կապերի բաժնից «Արմենպրես»-ին տեղեկացրել են, որ ձեռնարկվում են բոլոր հնարավոր միջոցները`տուժածների տեղափոխումն օդային և ցամաքային ճանապարհով ապահովելու համար։