Նախագծելով վաղվա Երևանը. քաղաքապետի ընտրություններին ընդառաջ խմբակցությունների նախագծերը
4 րոպեի ընթերցում
ԵՐԵՎԱՆ, 24 ՕԳՈՍՏՈՍԻ, ԱՐՄԵՆՊՐԵՍ: Երևանի քաղաքապետի ընտրություններին ընդառաջ «Լուսավոր Հայաստան», «Ապրելու երկիր» և «Քաղաքացիական պայմանագիր» կուսակցությունների անդամները ներկայացրին մայրաքաղաքի նախագծային խնդիրները և թե ինչպես են պատրաստվում լուծել դրանք:
«Արմենպրես»-ի հաղորդմամբ՝ «Լուսավոր Հայաստան» կուսակցությունից Երևանի քաղաքապետի թեկնածու Դավիթ Խաժակյանն ընդգծեց, որ Երևան քաղաքում շուրջ երեսուն տարի իրականացվել է հախուռն կառուցապատում, և այդ տարիների ընթացքում եղել է մեկ ընդհանրական կանոնակարգող փաստաթուղթ՝ քաղաքի գլխավոր հատակագիծը, որը 2020 թվականին իր իրավական ուժը կորցրել է և այս պահին նորը չկա:
«Այս ընտրություններին մենք մասնակցում ենք՝ ունենալով մի նախընտրական դրույթ, որը վերաբերվում է քաղաքի մաստերպլանը ներդնելուն: Այն մի փաստաթուղթ է, որը դեռևս Երևանը չի ունեցել, մինչդեռ աշխարհում գրեթե բոլոր զարգացած քաղաքներն ու մայրաքաղաքներն ունեն: Այն կլինի երկարաժամկետ փաստաթուղթ, որով կկանոնակարգվի ամբողջ քաղաքի զարգացման ծրագիրը. թե ինչպե՞ս քաղաքը պետք է զարգանա փողոց առ փողոց, ինչպիսի՞ և քանի՞ հարկ ունեցող շինություններ, սեփական տներ և կոմերցիոն տարածքներ պետք է լինեն:
Եթե մենք չունենանք այս փաստաթուղթը, այս հախուռն կառուցապատումը կշարունակվի, որտեղ կունենանք բազմահարկ շենքեր, բայց ոչ մի ենթակառուցվածք, մանկապարտեզ, պոլիկլինիկա, դպրոց և այլն»,- ասաց նա:
Խաժակյանն ընդգծեց, որ մաստերպլանը պետք է լինի ոչ միայն քաղաքական փաստաթուղթ, որը կընդգրկի բոլորի պատկերացումները քաղաքի զարգացման առումով, այլ նաև կլինի մասնագիտական փաստաթուղթ, որը պետք է ձևավորվի միջազգային փորձագետների ներգրավմամբ՝ դառնալով մի ֆունդամենտալ փաստաթուղթ, որը ամեն անգամ չի փոփոխվի՝ ինչպես քաղաքի գլխավոր հատակագիծը:
«Քաղաքացիական պայմանագիր» կուսակցության անդամ, Երևանի ավագանու թեկնածու Արթուր Մայիլյանն էլ ներկայացնելով իրենց կուսակցության առաջարկը, նշեց, որ ներդնելու են էլեկտրոնային համակարգ, որի շնորհիվ բոլոր քարտեզագրումները լինելու են էլեկտրոնային ձևաչափով:
«Հարթակը լինելու է հասանելի բոլորին: Ամբողջական տեղեկատվությունը արտացոլվելու է էլեկտրոնային հարթակներում, օրինակ՝ եթե կառուցապատողը ցանկություն ունենա ինչ-որ շինարարություն սկսելու, նա կարող է մտնել այդ կայքը և տեսնել, թե քաղաքի ո՞ր հատվածում քանի հարկանի շենքի շինթույլտվություն կարող է ստանալ»,- ասաց Արթուր Մայիլյանը:
«Ապրելու երկիր» կուսակցության անդամ, Երևանի ավագանու թեկնածու Դավիթ Մարգարյանն էլ անդրադառնալով մայրաքաղաքում իրականացվող կառուցապատման խնդիրներին, նշեց, որ շուրջ երեսուն տարի իրականացվել է կառուցապատում և գլխավոր հատակագիծը խախտվել է, քանի որ այն հասանելի չի եղել մարդկանց: Այն կառուցապատման տեսակետից պետք է հասանելի լինի բոլորին:
«Մենք էլ մեր նախընտրական ծրագրում ունենք երկարաժամկետ պլանավորման փաստաթուղթ, որի կարևոր ու առանցքային հարցերից մեկը հետևյալն է՝ այդ փաստաթղթում պետք է լինի երևանցին, քանի որ այդ նախագիծը և այդ փաստաթուղթը հենց երևանցու համար է: Իսկ մարդկանց մեր գործընթացին մասնակից դարձնելու տեսակետից տարբեր ձևաչափեր կան՝ ամենահասարակ հանրային քննարկումից մինչև տվյալ ոլորտի լավագույն մասնագետներին մասնակից դարձնելը»,- ասաց Դավիթ Մարգարյանը:
Երևանի ավագանու թեկնածուն ընդգծեց՝ պետք է չարչարվել, որպեսզի հետո այդ փաստաթուղթը փոխելու կարիք չլինի: