Փորձում ենք անել քայլեր, որոնք կհաղթահարեն Հայաստանի և Ադրբեջանի միջև առկա անվստահությունը. Փաշինյան
3 րոպեի ընթերցում
ԵՐԵՎԱՆ, 25 ՀՈՒԼԻՍԻ, ԱՐՄԵՆՊՐԵՍ: Վերջին երեսուն տարվա ընթացքում մեր առջև ստեղծվել է մի իրավիճակ, որի նկատմամբ մենք պետք է կարողանանք դիրքավորվել և հարաբերվել այդ իրավիճակի հետ։ Այս է պատճառը, որ բանակցային սեղանի շուրջ երբեք չեմ լսել այնպիսի ուղերձ, որ Ադրբեջանը հրաժարվում է խոսել Լեռնային Ղարաբաղի հայերի անվտանգության և իրավունքների մասին։ Բայց մյուս կողմից Ադրբեջանի ներկայացուցիչների հրապարակային հայտարարություններից չի երևում, չի բխում նման պատրաստակամություն։ Պետք է նաև ընդգծել, որ հասկանալի չեն այն դիրքորոշումները, որոնք հնչում են Լեռնային Ղարաբաղում՝ բացառելով այդ թեմայով քննարկումներն ու բանակցություններն Ադրբեջանի հետ։ Հիշատակման արժանի է այն, որ Լեռնային Ղարաբաղից հնչում են նաև ձայներ, որոնք անդրադառնում են երկխոսության անհրաժեշտությանը։
«Արմենպրես»-ի տեղեկացմամբ՝ այս տեսակետը հայտնեց ՀՀ վարչապետ Նիկոլ Փաշինյանն՝ ասուլիսում անդրադառնալով հայ-ադրբեջանական բանակցություններին։
«Խոսքը նախորդ բրյուսելյան հանդիպման ընթացքում արձանագրված պայմանավորվածության մասին է. Հայաստանն ու Ադրբեջանը պայմանավորվել են փոխադարձաբար ճանաչել միմյանց տարածքային ամբողջականությունը՝ իհարկե հաշվի առնելով, որ Լեռնային Ղարաբաղի ժողովրդի իրավունքների և անվտանգության հետ կապված խնդիր կա և այդ խնդիրը պետք է հասցեագրվի, ինչը հնարավոր չէ ժխտել։ Այլ բան է, որ հասկանալիորեն կա մեծ անվստահություն Ադրբեջանի կողմից Հայաստանի նկատմամբ և հակառակը, ուստի հարց է, թե ինչպես հաղթահարել այդ անվստահությունը։ Դա է պատճառը, որ մենք փորձում ենք անել քայլեր, որոնք այդ անվստահությունը կհաղթահարեն»,- ասաց Փաշինյանը։
Ըստ նրա՝ չափազանց կարևոր է Լեռնային Ղարաբաղում տիրող իրավիճակը և դրա հասցեագրումը, հումանիտար իրավիճակի հասցեագրումը և Լեռնային Ղարաբաղի հայության իրավունքների ու անվտանգության հասցեագրման օրակարգով երկխոսությունը։
«Կողմերի միջև անվստահությունն է պատճառը, որ մենք գտնում ենք՝ միայն միջազգային մեխանիզմի շրջանակներում կարող է շատ թե քիչ արդյունավետ երկխոսություն տեղի ունենալ, որի ընթացքում վստահության ստեղծման աղոտ քայլեր կամ հույսեր կարող են առաջանալ։ Մենք պետք է մեր դիտանկյունները հարցերի նկատմամբ փոխենք, թե ինչ տրամաբանությամբ ենք հարցերին նայում»,- նշեց ՀՀ վարչապետը։