Հիմնանորոգումից հետո վերաբացվել է Երևանի թիվ 143 մանկապարտեզը

2 րոպեի ընթերցում

ԵՐԵՎԱՆ, 19 ՀՈՒՆԻՍԻ, ԱՐՄԵՆՊՐԵՍ: Երևանի քաղաքապետարանի շինբարեկարգման ծրագրով հիմնանորոգվել ու վերաբացվել է Շենգավիթի թիվ 143 մանկապարտեզը:

Ինչպես «Արմենպրես»-ին տեղեկացրին Երևանի քաղաքապետարանից, նորոգման աշխատանքներն ընդգրկել են նկուղից մինչև տանիք: Շենքը նաև ամբողջությամբ ջերմամեկուսացվել է։ Մանկապարտեզում անցկացվել է օդափոխության համակարգ, տեղադրվել էներգախնայող լուսատուներ։ Հիմնանորոգման շնորհիվ ավելացել են նաև խմբասենյակները. նախկին 220 երեխայի փոխարեն մանկապարտեզ կհաճախի 280 փոքրիկ:

Ըստ աղբյուրի՝ երեխաների հետ շրջել ու նոր պայմաններին է ծանոթացել Երևանի փոխքաղաքապետ Տիգրան Ավինյանը: Բացմանը ներկա են եղել նաև Շենգավիթ վարչական շրջանի ղեկավար Ռազմիկ Մկրտչյանը, քաղաքապետարանի հանրակրթության վարչության պետ Մարգարիտ Խաչատրյանն ու շինարարության և բարեկարգման վարչության պետ Խորեն Գրիգորյանը:

«Մենք առաջնորդվում ենք եվրոպական չափորոշիչներով և ամենաբարենպաստ պայմաններն ենք ստեղծում երեխաների խնամքն ու կրթությունն ապահովելու համար: Վստահ եմ, որ 2025 թվականի ավարտին հիմնանորոգման կարիք ունեցող մակապարտեզ Երևանում չենք ունենա: Նախագծերում ներառում ենք նաև բակերի նորոգումը: Այս աշխատանքներն, անշուշտ, նպաստում են նաև հերթերի նվազեցմանը»,- նշել է Ավինյանը:

Նշվում է, որ այս տարի մայրաքաղաքում շահագործման կհանձնվի ամբողջությամբ հիմնանորոգված 22 մանկապարտեզ:

Բաժանորդագրվեք մեր ալիքին Telegram-ում