ԼՂ-ն արդեն պաշտոնապես շրջափակելն Ադրբեջանի ցեղասպան մտադրության դրսևորումն է. Ռուբինյանը՝ ԵԽԽՎ-ում

ԵՐԵՎԱՆ, 24 ԱՊՐԻԼԻ, ԱՐՄԵՆՊՐԵՍ: Լեռնային Ղարաբաղը ապրիլի 23-ից արդեն պաշտոնապես շրջափակելը Ադրբեջանի ցեղասպան մտադրության դրսևորումն է:

«Արմենպրես»-ի փոխանցմամբ՝ այս մասին հայտարարել է ԵԽԽՎ-ում Հայաստանի պատվիրակության անդամ, ԱԺ փոխնախագահ Ռուբեն Ռուբինյանը:

ԵԽԽՎ լիագումար նստաշրջանում իր ելույթը սկսելով Հայոց ցեղասպանության զոհերի հիշատակի 108-րդ տարելիցի մասին խոսքով՝ Ռուբինյանն ընդգծել է. «Ապագա վայրագությունները մենք կարող ենք և պետք է գոնե փորձենք կանխել: Այդպիսով մենք ստիպված չենք լինի հիշատակել ապագա վայրագությունները ապագա նիստերում»:

Նա ԵԽԽՎ-ում հայտարարել է, որ Ադրբեջանը երեկվանից արդեն պաշտոնապես արգելափակել է ԼՂ-ն ամբողջությամբ՝ ապօրինաբար անցակետ տեղադրելով Լաչինի միջանցքում, որը պետք է Հայաստանը կապեր ԼՂ-ին:

«Եվ այժմ 120 000 մարդիկ պատանդ են վերցվել՝ իրենց ատող երկրի կողմից: Եվ սա տեղի է ունենում ընդամենը մեկ շաբաթ անց Ադրբեջանի նախագահի այն հայտարարությունից, թե Ղարաբաղի հայերը կամ պետք է ընդունեն Ադրբեջանի քաղաքացիություն, կամ պետք է գտնեն ապրելու այլ տեղ: Եվ այն փաստը, որ նրանք երեկ պաշտոնապես սկսել են շրջափակել Ղարաբաղը, Ադրբեջանի ցեղասպան մտադրության դրսևորում է»,-հայտարարել է ԱԺ փոխնախագահը:

Ռուբինյանը հիշել է՝ սա հավանաբար 5-րդ, 6-րդ նստաշրջանն է, ինչ ինքը խոսում է այն սպառնալիքների մասին, որոնց բախվել է Լեռնային Ղարաբաղի 120 հազար բնակչությունը:

«Եվ ես չեմ խոսում քաղաքական ռիսկերի, իրենց իրավունքների վտանգի մասին, ես չեմ խոսում պատերազմի ռիսկի մասին, ես խոսում եմ ցեղասպանության ռիսկի մասին: Ես հուսով եմ, որ մենք ի վիճակի կլինենք կանխել դա: Եվ հուսով եմ, որ մենք բոլորս միասին ի վիճակի կլինենք զերծ պահել մեզ՝ ապագայում այլ վայրագություններ այստեղ կամ այլ տեղ հիշատակելուց»,-եզրափակել է Ռուբինյանը:

Ադրբեջանը, հերթական անգամ կոպտորեն խախտելով 2020թ. եռակողմ հայտարարության դրույթները, ապրիլի 23-ից փակել է Լաչինի միջանցքում գտնվող Հակարիի կամուրջը, ապօրինի կերպով տեղադրել է անցակետ: