398.94
Իշխան Զաքարյանը և Զարեհ Սինանյանը քննարկել են Համահայկական խաղերի նախապատրաստման հետ կապված հարցեր
1 րոպեի ընթերցում
ԵՐԵՎԱՆ, 18 ԱՊՐԻԼԻ, ԱՐՄԵՆՊՐԵՍ: Համահայկական խաղերի համաշխարհային կոմիտեի (ՀԽՀԿ) նախագահ Իշխան Զաքարյանը հանդիպել է Սփյուռքի գործերի գլխավոր հանձնակատար Զարեհ Սինանյանի հետ։
Ինչպես «Արմենպրես»-ին տեղեկացրին Համահայկական խաղերի համաշխարհային կոմիտեից, հանդիպմանը մասնակցել են ՀԽՀԿ՝ ԱՄՆ-ի, Մերձավոր Արևելքի, Ասիական, Եվրոպական, ԱՊՀ և այլ երկրների ու տարածաշրջանների աշխատանքները համակարգող մասնագետներն ու Հանձնակատարի գրասենյակի Սփյուռքի համայնքների հետ տարվող աշխատանքների պատասխանատուները։
Նշվում է, որ Իշխան Զաքարյանը ներկայացրել է այս պահին ստացված հայտերի նախնական վիճակագրությունը և Սփյուռքի հետ տարվող աշխատանքների կազմակերպչական ընթացքը։ Նա առաջարկել է, որպեսզի գրասենյակն ակտիվ ներգրավվի խաղերի նախապատրաստական աշխատանքներին՝ համատեղելով ուժերը Համահայկական խաղերի համաշխարհային կոմիտեի հետ:
Ըստ աղբյուրի՝ Զարեհ Սինանյանը նշել է, որ Համահայկական խաղերը Հանձնակատարի գրասենյակի օրակարգային հարցերից է և ավելացրել, որ առաջիկայում այցելություններ ունի եվրոպական մի շարք երկրներ, որոնց ընթացքում անպայման կանդրադառնա Համահայկական խաղերին։
Բաժանորդագրվեք մեր ալիքին Telegram-ում