Ապագա Հայկականի Համաժողովին ընդառաջ փորձագետները վերջնականացրել են քննարկվելիք սցենարներն ու առաջարկները:

ԵՐԵՎԱՆ, 28 ՓԵՏՐՎԱՐԻ, ԱՐՄԵՆՊՐԵՍ: Ապագա Հայկականի Համաժողովին ընդառաջ երեք փորձագիտական հանձնախմբերի վերջին հանդիպման ժամանակ ամփոփվել են այն սցենարները, առաջարկները և ուղղությունները, որոնք կներկայացվեն մարտի 10-ից 12-ը Երևանում կայանալիք Համաժողովի քննարկմանը, ապա նաև կհետևեն գործնական քայլեր՝ դրանք կյանքի կոչելու համար: «Արմենպրես»-ի փոխանցմամբ՝ 5 ամիս շարունակ փորձագիտական հանձնախմբերի առկա և առցանց ձևաչափերով աշխատանքներին մասնակցել են հայկական փորձագիտական համայնքի 100-ից ավել ներկայացուցիչներ: Հանրային քննարկումների արդյունքում Համաժողովի մասնակիցների կողմից շեշտադրվել են ռազմավարական առաջնահերթությունները, արվել ոլորտային քաղաքականություն վարելու առաջարկություններ:

«ԱՊԱԳԱ ՀԱՅԿԱԿԱՆԸ» զարգացման հիմնադրամի գործադիր տնօրեն Արտակ Ապիտոնյանը կարևորեց փորձագիտական հենքի հիման վրա արված առաջարկների քննարկումը Համաժողովի շրջանակում: «Ընտրված նպատակները՝ Հայաստան-Սփյուռք միասնականություն, Պատմական պատասխանատվություն, Բնակչութան աճ, բազմաոլորտ են, բազմաշերտ: Նույնիսկ մեկ Համաժողովով հնարավոր չէ ամբողջ հարցերին պատասխանել, բայց կարևոր է նախանշել, թե ինչ ծրագրային առաջարկներ ունենք նշված նպատակների իրագործման ուղղությամբ, ինչ բացեր ունենք, որ պետք է լրացնենք, ինչ հնարավոր ինստիտուտներ կան, որ պետք է ձևավորել, որպեսզի ունենանք մաքսիմալ փոխագործակցություն սփյուռքի հետ, առավելագույնս արդյունավետ օգտագործենք և՛ հայրենիքի, և՛ սփյուռքի ներուժը, լուծենք պատմական պատասխանտվության, սերունդների միջև երկխոսության ապահովման, պատմական ժառանգության ճանաչման և պահմանման, բնակչության աճի հետ կապված խնդիրները: Հայության ներուժը ռացիոնալ օգտագործելու մեծ անհրաժեշտություն կա այսօր»,-ասաց Ապիտոնյանը:

«ԱՊԱԳԱ ՀԱՅԿԱԿԱՆԸ» նպատակ ունի միավորել հայության ներուժը Հայաստանում, Արցախում և Սփյուռքում՝ ձևավորելու ապագային ուղղված տեսլական և այն նպատակները, որոնց հայությունն ուզում է հասնել՝ և՛ հայրենիքում, և՛ սփյուռքում: Դրա համար մշակվել են 15 նպատակներ:

Անդրադառնալով Համաժողովի անցկացման գաղափարին՝ Ապիտոնյանն ասաց. «Նախաձեռնության համահիմնադիրների կողմից ինչ-որ պահի ըմբռնում եղավ, որ պետք է քննարկումները կրեն հանրային բնույթ: Նախընտրությունը տրվեց «քաղաքացիական ասամբլեա» մոդելին: «Քաղաքացիական ասամբլեան» մասնակցային ժողովրդավարության մոդել է, որը թույլ է տալիս քննարկումներ անցկացնել, որոշումներ ընդունել և հանրության համար կարևորագույն խնդիրների լուծման շուրջ որոշակի սցենարներ, առաջարկներ մշակել՝ հենց հանրության անմիջական ներգրավվածությամբ և մասնակցությամբ»,- ասաց նա: Նշենք նաև՝ թափանցիկ վիճակահանության արդյունքում նախապես գրանցված հազարավոր հայրենակիցներից արդեն իսկ ընտրվել են Համաժողովի 200 մասնակիցները:

Այսպիսով՝ փորձագիտական հանձնախմբերը ձևավորել են այն փորձագիտական նյութը, հենքը, որը դրվելու է «քաղաքացիական ասամբլեայի» քննարկմանը: Փորձագիտական, հանրային փուլից հետո հաջորդը լինելու է համագործակցային ցանցի ձևավորումը: «Համագործակցային ցանցի ձևավորման համար «ԱՊԱԳԱ ՀԱՅԿԱԿԱՆԸ» փորձելու է աշխատել բոլոր հաստատությունների հետ՝ Հայաստանում և սփյուռքում՝ անհրաժեշտության դեպքում ներգրավելով միջազգային գործընկերների, որպեսզի ձևավորենք հնարավորինս լայն համագործակցային ցանց՝ այդ առաջարկություններն ու ծրագրերը կյանքի կոչելու ուղղությամբ»,- վստահեցրեց Ապիտոնյանը:

Ապիտոնյանը կարևորեց նաև Ապագա Հայկականի Համաժողովի սկզբունքները: Առաջինը՝ Հայաստանի և սփյուռքի միջև միասնականության զարգացման ձևավորումն է, հաջորդը՝ ներառականությունը. նախաձեռնությունը բաց է բոլորի առջև, ցանկություն ունեցող ցանկացած հայ կարող է մասնակցել: Կարևոր սկզբունքներից է նաև թափանցիկությունը. համաժողովի քննարկումները լինելու են լիովին թափանցիկ, քննարկումները համարվելու են հանրային սեփականություն: Ակնկալվող արդյունքներից են հասարակության մեջ բևեռացման հաղթահարումը, քաղաքական ինստիտուցիոնալ փակուղիների հնարավոր շրջանցումը, քաղաքացիներին ակտվիացնելը, հնարավորինս համապարփակ փորձագիտական կարծիք ձևավորելը, որպեսզի բոլոր հնարավոր տարբերակները դրվեն սեղանին, քննարկվեն բոլոր հնարավոր լուծումները: