Երևանի էներգաարդյունավետության ծրագրով հիմնանորոգված հ. 71 մանկապարտեզը կվերաբացվի մարտից

ԵՐԵՎԱՆ, 1 ՓԵՏՐՎԱՐԻ, ԱՐՄԵՆՊՐԵՍ: Հիմնանորոգումից հետո Երևանի հ.71 մանկապարտեզը շուրջ 360 փոքրիկի համար դռները կբացի մարտից: 1980-ական թվականներին հիմնադրված նախակրթարանը հերթականն ու ամենաընդարձակներից է, որ ընդգրկված է Երևանի էներգաարդյունավետության ծրագրում:

Ինչպես «Արմենպրես»-ին տեղեկացրին Երևանի քաղաքապետարանից, երեխաների համար ստեղծված պայմաններին Հայաստանում Եվրոպական միության պատվիրակության ղեկավար, դեսպան Անդրեա Վիկտորինի ու ծրագրի աջակից և գործընկեր մյուս կառույցների ներկայացուցիչների հետ ծանոթացել են Երևանի քաղաքապետ Հրաչյա Սարգսյանը, քաղաքապետի առաջին տեղակալ Լևոն Հովհաննիսյանը և փոխքաղաքապետ Տիգրան Ավինյանը:

«Եվրամիության հետ բավականին լավ աշխատանք է ստացվում բոլոր ուղղություններով և, կարծում եմ, որ այն նախանշած ծրագրերը, որոնք պետք է իրագործենք, բավականին հեշտությամբ առաջ կընթանան: Սա այս տարվա երկրորդ մանկապարտեզն է, որ բացում ենք, առաջիկայում նոր մանկապարտեզների բացումներ ևս կունենանք: Մենք կապահովենք հարմարվետ ու տաք միջավայր մեր երեխաների համար, ծնողները կլինեն ավելի հանգիստ: Կարծում եմ, որ այս ծրագրով մենք հնարավորություն կունենանք մոտակա 2-3 տարվա ընթացքում Երևանի քաղաքապետարանի ենթակայության բոլոր մանկապարտեզները հիմնանորոգել՝ ստեղծելով բարենպաստ միջավայր մեր երեխաների զարգացման համար»,- նշել է Երևանի քաղաքապետ Հրաչյա Սարգսյանը:

Ըստ աղբյուրի՝ կարևոր այս նախագծի ընդհանուր արժեքը շուրջ 15 միլիոն եվրո է: Այն ֆինանսավորվում է Եվրոպական ներդրումային բանկից, Արևելյան Եվրոպայի էներգախնայողության և շրջակա միջավայրի գործընկերության հիմնադրամից, Կանաչ կլիմայի հիմնադրամից, և Երևան համայնքի բյուջեից: Այս մանկապարտեզի վերակառուցման արժեքը շուրջ 552 մլն ՀՀ դրամ է:

«E5P ծրագիրը լավագույնս ներկայացնում է այն հաջողված գործակցությունը, որ ունենք այս տարիների ընթացքում: Մեր տարբեր գործընկերների, դոնոր հանրության և տեղական պատկան մարմինների հետ համատեղ կարողացել ենք իրագործել էներգաարդյունավետության բազմաթիվ միջոցառումներ, որոնք տարբեր ոլորտներ են ընդգրկում. մանկապարտեզների հիմնանորոգում, «կանաչ» ավտոբուսների ձեռք բերում, կոշտ թափոնների կառավարում»,- նշել է Հայաստանում Շվեդիայի Թագավորության արտակարգ և լիազոր դեսպան Պատրիկ Սվենսոնը:

«Սա տնտեսական ներդրումային պլանի ուղենիշերից մեկն է, և մենք, ըստ էության, շարունակելու ենք ներդրումներ անել ավելի կանաչ, էներգաարդյունավետ միջավայր ձևավորելու նպատակով, որը ենթադրում է ընդգրկուն ծրագրեր: Մենք նախատեսում ենք ընդլայնել մեր գործակցությունը Երևանի քաղաքապետարանի հետ: Ուզում ենք անել ամեն ինչ, որպեսզի Երևանը դառնա ավելի լավ տեղ քաղաքացիների համար»,- ընդգծել է Հայաստանում Եվրոպական միության պատվիրակության ղեկավար, դեսպան Անդրեա Վիկտորինը:

Նշվում է, որ 2021թ. մեկնարկած ծրագիրը հիմնովին փոխել է Երևանի հ.71 մանկապարտեզի միջավայրն ու շենքային պայմանները: Մանկապարտեզում ստեղծվել են ոչ միայն էներգաարդյունավետ, լուսավոր, այլև անվտանգ պայմաններ: Տեղադրվել են էներգաարդյունավետությանը միտված սարքավորումներ, արևային ֆոտովոլտային վահանակներ, լեդ լուսատուներ, փոխվել են նաև դռներն ու լուսամուտները, տանիքի, պատերի ջերմամեկուսացում է կատարվել, ինչի շնորհիվ կնվազեն հանրային շենքերի էներգետիկ սպասարկման ծախսերը, ինչպես նաև կնվազի CO2 գազի արտանետման ծավալը: Որպես կարևոր բաղադրիչ՝ առանձնակի ուշադրություն է դարձվել նաև շենքի սեյսմիկ ամրակայմանը:

«Շատ կարևոր է, որ այս մանկապարտեզը հիմնանորոգվել է որոշակի չափանիշներով և, առաջին հերթին, կարելի է ասել, որ այս նախագիծը կրթության մասին է և ոչ միայն շենքը հիմնանորոգելու, որովհետև մենք նոր տեսակի միջավայր ենք ստեղծում մեր երեխաների համար, փորձում ենք նաև այդ կրթական բաղադրիչը ներառել ծրագրերում, որտեղ երեխաները սկսում են ավելի խորքային հասկանալ, թե ինչ է նշանակում շրջակա միջավայր, ինչ է նշանակում վնաս չհասցնել շրջակա միջավայրին: Սա հաջողված այն ծրագրերից է, որի շարունակականությունը պետք է ապահովենք»,- նշել է Երևանի փոխքաղաքապետ Տիգրան Ավինյանը:

«Մեր նպատակն այն է, որ երեխաները կարողանան նման անվտանգ և էներգաարդյունավետ միջավայրում խաղալ ու կրթվել: Մեր կլիմայական բանկի բոլոր միջոցառումները միտված են կլիմայի և մեր մոլորակի պաշտպանությանը, և մեր համագործակցությունը Երևանի քաղաքապետարանի հետ ապագայում ևս նախատեսում ենք շարունակել»,- նշել է Եվրոպական ներդրումային բանկի Հարավային Կովկասի տարածաշրջանային ներկայացուցչության ղեկավար Մաչիեյ Չուրանը:

Երևանի քաղաքապետարանի տեղեկացմամբ՝ գործընկեր կառույցների աջակցությամբ Երևանի էներգաարդյունավետության ծրագրով առաջիկա տարիներին ևս համայնքային մի շարք մանկապարտեզներ, ինչպես նաև պոլիկլինիկաներ կհիմնանորոգվեն: Հանդիսավոր արարողության ժամանակ մրցույթում հաղթած կապալառու կազմակերպության հետ ստորագրվել են նախակրթարանների ու պոլիկլինիկաների հիմնանորոգման պայմանագրերը:

«Բոլոր այն մանկապարտեզները, որոնք որոշակի գրագետ չափորոշիչներով ի սկզբանե պլանավորված նախագծեր են ունեցել, միշտ հաջող հիմնանորոգում են ստանում: Շուտով ունենալու ենք ևս մեկ ծրագիր՝ ի շարունակություն այս ծրագրերի, որտեղ 30 մանկապարտեզ և 6 պոլիկլինիկա նույն այս մեթոդով ու չափորոշչով նորոգվելու են, դառնալու են էներգաարդյունավետ, ավելի քիչ էներգիա են ծախսելու և ավելի հարմարավետ են դառնալու»,- նշել է Տիգրան Ավինյանը:

Մինչ երկրորդ փուլի մեկնարկը՝ նախագծի 1-ին փուլով նախատեսված է 12 մանկապարտեզի հիմնանորոգում և ևս 3-ի վերակառուցում: Հ. 71-ն այս ծրագրով վերանորոգված 4-րդ մանկապարտեզն է: