4 րոպեի ընթերցում
ԵՐԵՎԱՆ, 19 ՀՈՒՆՎԱՐԻ, ԱՐՄԵՆՊՐԵՍ: Միգրանտների, վերադարձած միգրանտների և նրանց ընտանիքների անդամների կողմից արդեն իսկ հիմնադրված կամ ապագայում ստեղծվելիք բիզնեսների զարգացմանն աջակցելու նպատակով իրականացվող EU4IMPACT ծրագիրն ամփոփեց 2021 թ-ի նոյեմբեր և 2022 թ-ի մայիս ամիսներին անցկացված առաջին և երկրորդ փուլերի արդյունքները:
«Արմենպրես»-ի հաղորդմամբ՝ դրամաշնորհ ստացած, Հայաստանի բոլոր մարզերը ներկայացնող 59 շահառուներ ստացան մասնակցության հավաստագրեր:
Հայաստանում ԵՄ պատվիրակության ղեկավար, ԵՄ դեսպան Անդրեա Վիկտորինը նշեց՝ ծրագիրը բեկումնային է: Նրա համոզմամբ՝ այն լավ օրինակ է ցույց տալու, թե ինչպես կարելի է աջակցել անհատներին ձեռներեց դառնալու գործում:
«Ես տպավորված էի՝ տեսնելով մարզերից դիմողների քանակը: Մեր նպատակն է օգնել մարդկանց կյանքի ղեկը իրենց ձեռքը վերցնելու գործում, քանի որ մենք հիմա ապրում ենք չափազանց բարդ ժամանակաշրջանում: Սա իրապես լավ հնարավորություն է լավ ապագա կառուցելու համար»,- նշեց Անդրեա Վիկտորինը:
Դեսպանը նշեց, որ 2021 թ-ի նոյեմբեր և 2022 թ-ի մայիս ամիսներին անցկացված առաջին և երկրորդ փուլերի արդյունքում ծրագրին մասնակցելու համար հայտ է ներկայացրել 200 դիմորդ: Ավելի քան 160 դիմորդ մասնակցել է «Իրիս բիզնես ինկուբատոր» հիմնադրամի կողմից կազմակերպված բիզնեսի կառավարման առցանց դասընթացին և ավելի քան 100 դիմորդ կազմել է բիզնես ծրագիր և ներկայացրել մրցութային հանձնաժողովի քննությանը, որի արդյունքում ֆինանսավորման համար ընտրվել են լավագույն 59 բիզնես ծրագրերը:
«Յուրաքանչյուրս, անկախ նրանից, թե որտեղ ենք ապրում, ցանկանում ենք հայտնվել հայրենիքում, որպեսզի կարողանանք ի կատար ածել մեր ցանկությունները: Ես շնորհակալ եմ ծրագրի կազմակերպիչներին: Անհամբեր սպասում ենք նաև շոշափելի արդյունքներին»,-նշեց ՀՀ սփյուռքի գործերի գլխավոր հանձնակատար Զարեհ Սինանյանը:
Նրա խոսքով՝ շահառուների կողմից առաջարկվող բիզնես գաղափարները բազմազան են և, մասնավորապես, իրականացվելու են ծառայությունների մատուցման, արտադրության և գյուղատնտեսության ոլորտներում: Հաստատված բիզնես գաղափարները ներառում են բնական հումքով կոսմետիկայի արտադրություն, թղթյա արտադրանք, ասիական քաղցրավենիք, պահածոներ, հացաբուլկեղեն, մսամթերք, անասնակերի հավելում և այլն: Ծրագրի շրջանակներում ստեղծվելու են ջերմոցներ ծաղիկներ, մրգեր կամ բանջարեղեն աճեցնելու համար, բացվելու են հյուրատներ, երեխաների ստեղծագործական կենտրոն, սրճարան, ինչպես նաև շահառուները զբաղվելու են անասնապահությամբ և մեղրի արտադրությամբ:
Ավելի քան 80 մատակարարից ձեռք են բերվել և շահառուներին տրամադրվել ավելի քան 20 ապրանքատեսակ և ծառայություններ:
Ծրագիրը շարունակվելու է մինչև 2024 թ-ի սեպտեմբեր: Անցկացվելու են հայտերի ընդունման ևս 3 փուլ: Երրորդ փուլն արդեն իսկ հայտարարվել է, հայտերի ընդունման վերջնաժամկետն է 2023 թ-ի հունվարի 31-ին: Հայտերի ընդունման ևս երկու փուլ անցկացվելու են 2023 - 2024 թթ:
Ծրագիրը իրականացվում է Միգրացիոն քաղաքականության մշակման միջազգային կենտրոնի հայաստանյան գրասենյակի կողմից:
Ծրագրին մասնակցելու համար հայտ ներկայացնելու միջոցով շահառուները կարող են ստանալ 2 000-ից մինչև 10 հազար եվրո դրամաշնորհ, որը կհամալրվի շահառուի կողմից հատկացվող հավասար համաֆինանսավորմամբ: Շահառուները հնարավորություն ունեն ստեղծել կամ զարգացնել արդեն իսկ գործող բիզնեսը, ինչպես նաև ձեռք կբերեն հմուտ, մասնագիտացված և արդի բիզնեսի կառավարման համար անհրաժեշտ գիտելիքներ և հմտություններ: Շահառուների անհատական կարիքները հաշվի առնելով՝ ծրագրի գործընկեր «Իրիս բիզնես ինկուբատոր» հիմնադրամը կազմակերպում է բիզնեսի կառավարման դասընթաց, ինչպես նաև ընթացիկ խորհրդատվություն է տրամադրում շահառուներին։