Արմեն Ռուստամյանն առաջարկում է արցախահայությանը պաշտպանելու համար ստեղծել մեկ միասնական կենտրոն
1 րոպեի ընթերցում
ԵՐԵՎԱՆ, 16 ՀՈՒՆՎԱՐԻ, ԱՐՄԵՆՊՐԵՍ։ Լաչինի միջանցքի շուրջ ստեղծված իրավիճակում բոլորը ունեն իրենց պատասխանատվության բաժինը և բոլորը հասկանում են,որ խնդիրն այսպես երկար ձգվել չի կարող։
Ինչպես տեղեկացնում է «Արմենպրես»-ը, լրագրողների հետ ճեպազրույցում այս մասին ասաց «Հայաստան» խմբակցության պատգամավոր Արմեն Ռուստամյանը։
«Պետք է այս խնդիրը լուծում ստանա։ Եթե Ադրբեջանը կարծում է, որ անընդհատ, մշտական, անժամկետ ճանապարհը փակելով հասնելու է իր նպատակների՝ տեսնելով արցախահայության անկոտրում կամքը, բնականաբար, նահանջելու է։ Պայքարով է միայն հնարավոր դրա դեմն առնել և հակակշռել։
Մեզ այսօր պարզապես պակասում է արցախահայությանը պաշտպանելու համահայկական գործընթացը, որը պետք է օր առաջ ստեղծել և իրականացնել։ Մեր բոլոր առաջարկները դրան են ուղղված։ Պետք է ստեղծվի մեկ միասնական կենտրոն՝ անունը շտաբ կամ խորհուրդ կլինի, որը պետք է առաջացնի համահայկական զորաշարժ»,- ասաց Ռուստամյանը։
Պատգամավորի խոսքով՝ հայ ժողովուրդը չի կարող նստած սպասել և հեռվից դիտել, թե ինչքան կդիմանա Արցախը։