Արդարադատության միջազգային դատարանը Ադրբեջանի դեմ Հայաստանի պահանջի վերաբերյալ լսումներ կանցկացնի
2 րոպեի ընթերցում
ԵՐԵՎԱՆ, 14 ՀՈՒՆՎԱՐԻ, ԱՐՄԵՆՊՐԵՍ: ՄԱԿ-ի առանցքային դատական մարմինը՝ Արդարադատության միջազգային դատարանը, հունվարի 30-ին Ադրբեջանի դեմ Հայաստանի ներկայացրած հայցի հիման վրա հանրային լսումներ կանցկացնի:
Ինչպես «Արմենպրես»-ը տեղեկացավ Արդարադատության միջազգային դատարանի տարածած մամուլի հաղորդագրությունից. հունվարի 30-ին Հաագայի Խաղաղության պալատում կանցկացվեն Ռասայական խտրականության բոլոր ձևերի վերացման մասին միջազգային կոնվենցիայի կիրառման գործով հանրային լսումներ՝ Հայաստանն ընդդեմ Ադրբեջանի հայցի հիման վրա:
Լսումները նվիրված են լինելու Հայաստանի Հանրապետության կողմից 2022 թվականի դեկտեմբերի 27-ին դատարան ներկայացված՝ միջանկյալ միջոցների կիրառելու խնդրանքին:
ՄԱԿ-ի դատարանը հունվարի 31-ին նաև լսումներ կանցկացնի՝ Ադրբեջանն ընդդեմ Հայաստանի հայցի հիման վրա:
Ավելի վաղ Հայաստանն Ադրբեջանի դեմ հայց էր ներկայացրել ՄԱԿ-ի Արդարադատության միջազգային դատարան Ռասայական խտրականության վերացման կոմիտեի վարույթի շրջանակներում: Հայաստանը Հաագայի դատարանին խնդրել է կիրառել հետևյալ միջանկյալ միջոցները՝ պարտավորեցնել Ադրբեջանին դադարեցնել ենթադրյալ «ցույցերի» կազմակերպումը և դրանց աջակցությունը, որի հետևանքով արգելափակվել է Լաչինի միջանցքով անարգել ազատ տեղաշարժը: Բացի այդ, Հայաստանը խնդրել է դատարանին պարտավորեցնել Ադրբեջանին ապահովել Լաչինի միջանցքով բոլոր մարդկանց, տրանսպորտային միջոցների և բեռների անարգել ազատ տեղաշարժը: