ԱՍՀ նախարարը և Բուլղարիայի դեսպանը պայմանավորվել են քննարկումները շարունակել աշխատանքային հանդիպումների, այցերի ձևաչափով
2 րոպեի ընթերցում
ԵՐԵՎԱՆ, 13 ՀՈՒՆՎԱՐԻ, ԱՐՄԵՆՊՐԵՍ: Աշխատանքի և սոցիալական հարցերի նախարար Նարեկ Մկրտչյանը հունվարի 13-ին ընդունել է Հայաստանում Բուլղարիայի արտակարգ և լիազոր դեսպան Կալին Անաստասովին։
Ինչպես «Արմենպրես»-ին տեղեկացրին ՀՀ աշխատանքի և սոցիալական հարցերի նախարարությունից, ընդգծելով հայ-բուլղարական հարաբերությունների կարևորությունը՝ նախարար Մկրտչյանն էական է համարել երկկողմ համագործակցության ուղղությունների ընդլայնումն աշխատանքի և սոցիալական պաշտպանության ոլորտում։
«Նախարարի խոսքով՝ երկու երկրների ոլորտային հարաբերություններում առկա է զգալի ներուժ, որն անհրաժեշտ է օգտագործել բարեփոխումների, այդ թվում՝ ժողովրդագրության, երեխայի խնամքի հաստատությունների ապաինստիտուցիոնալացման, խնամատարության ինստիտուտի զարգացման և մի շարք այլ ուղղություններով։
Նախարարն ընդգծել է նաև, որ Աշխատանքի և սոցիալական հարցերի նախարարությունը հատկապես վերջին շրջանում ակտիվ աշխատում է ՀՀ-ում դիվանագիտական ներկայացուցչությունների, ինչպես նաև միջազգային կազմակերպությունների հետ, ինչը հնարավորություն է տալիս ուսումնասիրել այլ երկրների լավագույն փորձն ու տեղայնացնել այն»,- ասվում է հաղորդագրության մեջ։
Ըստ աղբյուրի՝ դեսպան Կալին Անաստասովի խոսքով ևս՝ երկու երկրների սոցիալական պաշտպանության ոլորտի խնդիրներն ու առաջնահերթությունները միանման են, ինչը համատեղ աշխատելու լայն հնարավորություն է տալիս։ Դեսպանն առաջարկել է նաև փոխադարձ հետաքրքրություն ներկայացնող հարցերի շրջանակում դիտարկել երկուստեք փորձագիտական աջակցություն տրամադրելու հնարավորությունը, ինչի իրականացման նպատակով բուլղարական կողմը պատրաստակամ է ունենալ գործուն մասնակցություն։
Նշվում է, որ հանդիպման ավարտին պայմանավորվածություն է ձեռք բերվել քննարկումները շարունակել աշխատանքային հանդիպումների, փոխադարձ այցերի ձևաչափով՝ բանավոր պայմանավորվածությունները տեղափոխելով գործնական փուլ։