Ադրբեջանցիներին չեն հետաքրքրում հանքավայրերը, իրենք ցանկություն ունեն հպատակեցնելու Արցախը. Սերժ Սարգսյան
2 րոպեի ընթերցում
ԵՐԵՎԱՆ, 14 ԴԵԿՏԵՄԲԵՐԻ, ԱՐՄԵՆՊՐԵՍ: Կառավարության շենքի մոտ Հայաստանի Հանրապետական կուսակցության նախաձեռնությամբ անցկացվում է հանրահավաք՝ ուղղված Ադրբեջանի կողմից Արցախի շրջափակման դեմ ու ի աջակցություն արցախահայությանը։ Ինչպես տեղեկացնում է «Արմենպրես»-ը, հանրահավաքի մասնակիցները նշում են, որ արցախահայերը ադրբեջանական սադրանքների պատճառով հայտնվել են հումանիտար ճգնաժամի շեմին, ստեղծված իրավիճակը ադրբեջանական հայատյաց և ցեղասպան քաղաքականության հերթական դրսևորում է:
ՀՀԿ առաջնորդ, ՀՀ երրորդ նախագահ Սերժ Սարգսյանի խոսքով՝ ակնհայտ է, ադրբեջանցիներին չեն հետաքրքրում ոչ հանքավայրերը, ոչ դրանց ճիշտ կամ սխալ օգտագործումը: «Իրենք ուղղակի ցանկություն ունեն հպատակեցնելու Արցախը, արցախցիներին, բայց ես վստահ եմ՝ դա նրանց չի հաջողվելու»,- լրագրողների հետ զրույցում ասել է նախկին նախագահը:
Սարգսյանի խոսքով՝ պատմության ընթացքում եղել են բազմաթիվ դեպքեր, երբ արցախցիները դժվարություններին ու արհավիրքներին դիմակայելու բացառիկ կամք են ցուցաբերել:
«Այս անգամ էլ են դիմակայելու, ուղղակի թե ինչ գին ենք վճարելու, դա է մի քիչ հարցական: Ամեն ինչ կախված է Արցախի ղեկավարությունից»,-ասաց նա:
ԱԺ պատգամավոր Տիգրան Աբրահամյանի խոսքով՝ միակ խնդիրը Լաչինի միջանցքը բացելը չէ, խնդիրը նաև այն է, որ հակամարդկային ճնշումների միջոցով Հայաստանին և Արցախին ներկայացվել է նոր վերջնագիր:
«Ադրբեջանը այսօր հստակ գնում է Արցախը հայաթափելու և մաս-մաս խլելու ճանապարհով: Շատ ենք խոսում միջազգային հանրության սպասելիքների մասին, ուզում եմ, որ Հարավային Կովկասում հավակնություն ունեցող բոլոր երկրները ու միջազգային կառույցները հասկանան, որ այսօր միայն իրենց հեղինակազրկման խնդիրը չէ: Այսօր է որոշվում նաև իրենց մեր տարածաշրջանում ազդեցություն ունենալ, թե չունենալու խնդիրը: Դերակատարներն այսօր պետք է իմանան, որ հայ ժողովրդի համար այս կարևոր փուլում պետք է օգտագործեն իր հնարավորությունները, որոնք կարող են Ադրբեջանին զսպել, ճնշել և այս ամենից հետ կանգնեցնեն»,- հանրահավաքի ժամանակ իր ելույթում ասաց Աբրահամյանը: