Հայաստանում բարելավվում են հարկադիր կատարող-քաղաքացի անմիջական շփումների և ծառայությունների որակի բարձրացման հնարավորությունները
1 րոպեի ընթերցում
![Հայաստանում բարելավվում են հարկադիր կատարող-քաղաքացի անմիջական շփումների և ծառայությունների որակի բարձրացման հնարավորությունները](http://armenpress.am/resized/480/static/news/b/2022/10/1093954.jpg)
ԵՐԵՎԱՆ, 3 ՀՈԿՏԵՄԲԵՐԻ, ԱՐՄԵՆՊՐԵՍ: Արդարադատության նախարարի պարտականությունները կատարող Գրիգոր Մինասյանն այցելել է Հարկադիր կատարումն ապահովող ծառայություն, ծանոթացել Ծառայության շենքում ստեղծվելիք Քաղաքացիների ընդունելության կենտրոնում իրականացվող շինարարական աշխատանքներին:
Ինչպես «Արմենպրես»-ին տեղեկացրին ՀՀ արդարադատության նախարարությունից, Գրիգոր Մինասյանն ընդգծել է Կենտրոնի ստեղծման անհրաժեշտությունը՝ կարևորելով քաղաքացիների և հարկադիր կատարողների միջև արագ ու արդյունավետ կապի հաստատումն ու ամրապնդումը:
Մինասյանը նշել է, որ ստեղծվելիք Կենտրոնը լինելու է նոր հարթակ, որի միջոցով քաղաքացիները հնարավորություն են ունենալու ծանոթանալ կատարողական վարույթի նյութերին, կապ հաստատել վարույթն իրականացնող հարկադիր կատարողների հետ և ստանալ իրենց հուզող հարցերի պատասխանները:
Կենտրոնը տալու է հեշտ, արագ և հասանելի ծառայությունների մատուցման, հարկադիր կատարող-քաղաքացի անմիջական շփումների հաստատման և ծառայությունների որակի բարձրացման հնարավորություններ:
Գրիգոր Մինասյանը կարևորել և ողջունել է նաև բոլոր այն քայլերը, որոնք միտված են թեթևացնել քաղաքացիների բեռն ու մատչելի ծառայություններ տրամադրել նրանց: