Թուրքիայի ընդդիմության առաջնորդն ի նշան բողոքի հրաժարվում է վճարել էլեկտրաէներգիայի վարձավճարը

ԵՐԵՎԱՆ, 10 ՓԵՏՐՎԱՐԻ, ԱՐՄԵՆՊՐԵՍ: Թուրքիայի ընդդիմադիր Ժողովրդահանրապետական կուսակցության առաջնորդ Քեմալ Քըլըչդարօղլուն ասել է, որ չի վճարի իր էլեկտրաէներգիայի վարձերը, քանի դեռ նախագահ Էրդողանը չի հրաժարվել գների վերջին բարձրացումներից: «Արմենպրես»-ի հաղորդմամբ՝ այս մասին հայտնում է Reuters-ը:

Թուրքիայի նախագահի իշխող կուսակցությունը քննադատել է այդ քայլը՝ որակելով որպես սադրանք՝ աճող գնաճի պատճառով աճող դժգոհության ֆոնին:

Reuters-ը գրում է՝ հունվարին Թուրքիայում գնաճը հասել է գրեթե 50 տոկոսի՝ անցյալ տարվա վերջին արժույթի անկումից հետո, որը պայմանավորված էր Էրդողանի ցածր տոկոսադրույքների քաղաքականությամբ, ինչը թանկացրել է ապրուստը թուրքերի համար:

Կառավարությունն ի պատասխան դրան բարձրացրել է նվազագույն աշխատավարձը 50 տոկոսով, բայց նաև բարձրացրել է գազի, էլեկտրաէներգիայի, բենզինի և ճանապարհային վճարները:

«Այսօրվանից ես չեմ վճարի էլեկտրաէներգիայի իմ ոչ մի վճարը, քանի դեռ Էրդողանը չի վերացրել թանկացումները, որոնք ստորագրել էր դեկտեմբերի 31-ին»,- ասել է Ժողովրդահանրապետական կուսակցության առաջնորդ Քեմալ Քըլըչդարօղլուն։

Թուրքիայում էլեկտրաէներգիայի սակագինը հունվարի սկզբին բարձրացել է 125 տոկոսով՝ բարձր պահանջարկ ունեցող արդյունաբերական օգտագործողների և մոտ 50 տոկոսով՝ցածր պահանջարկ ունեցող տնային տնտեսությունների համար: