Անհետ կորած զինծառայողների ծնողները ԱԱԾ շենքի դիմաց են. կառույցի տնօրենից պահանջում են վերադարձնել իրենց զավակներին

ԵՐԵՎԱՆ, 19 ՕԳՈՍՏՈՍԻ, ԱՐՄԵՆՊՐԵՍ: Արցախյան 44-օրյա պատերազմում անհետ կորած զինծառայողների ծնողները Ազգային անվտանգության ծառայության շենքի դիմաց են:

«Արմենպրես»-ի հաղորդմամբ՝ նրանք պահանջում են որոնողական աշխատանքների շրջանակում ձեռնարկվող քայլերն ավելի հստակեցում:

«Մենք պահանջում ենք, որպեսզի ստանանք մեր երեխաների աճյունները կամ, եթե ողջ են ու գերի են, այդ ուղղությամբ քայլեր ձեռնարկվեն ու հայրենիք վերադարձվեն: Հավաքվել ենք ընդամենը 1 դիվիզիոնի ծնողներով: Մենք անելանելի վիճակում ենք հայտնվել, համագործակցում ենք բոլոր կառույցների հետ: Արդեն 10 ամիս է, ինչ անհրաժեշտ փաստեր, տվյալներ կան, տրամադրում ենք: 21 անհետ կորած զինծառայողից միայն 9-ի մասունքներն են գտնվել: Նրանցից ութինը նույնականացվել են, մեկինը՝ դեռ չի ստացվում»,- նշեց անհետ կորած զինծառայողներից մեկի ծնողը:

Խոսելով որդու վերաբերյալ վերջին տեղեկությունների մասին՝ նա նշեց, որ հոկտեմբերի 12-ին իրենց տղաներին տարել են Հադրութի շրջան, որն այդ ժամանակ արդեն գրեթե Արցախի ՊԲ հսկողության տակ չէր: Տղաները հրետանավորներ են եղել:

«Մեր տղաներին այնպիսի դիրքեր են տարել, որտեղից մի քանի հոգի են փրկվել: Մեկ սպա է եղել, որ մինչև վերջ մնացել է տղաների կողքին, և նրա ճակատագիրն էլ այժմ անհայտ է: Այս տեղեկությունները մենք ենք պարզել, դիմել ենք դատախազություն»,- ասաց նա:

Ծնողն ասաց, որ այդ ժամանակ վիրավորներ են եղել, հրամանատարը կապ է հաստատել ու հայտնել այդ մասին, սակայն ոչ ոք չի գնացել նրանց դուրս բերելու:

«Այնտեղ սպաներ են եղել, և փախուստի դիմելիս նրանք վրաերթի են ենթարկել մեկ զինծառայողի ու այդ վիճակում թողել են խրամատներում ու հեռացել: Այդ փաստի մասին տեղեկությունները քրեական գործում կան: Կազմակերպչական գործողությունները շատ վատ են իրականացվել»,- ասաց ծնողը:

Անհետ կորած զինծառայողների ծնողները 2 անգամ հանդիպել են Ազգային անվտանգության ծառայության տնօրեն Արմեն Աբազյանի հետ, ով օգնելու խոստում է տվել, սակայն մինչ օրս այն չի կատարվել:

«Մենք պետք է այսօր մտնենք պարոն Աբազյանի մոտ և այդ հարցն էլ բարձրացնենք: Վերջին հանդիպումը եղել է հունիս ամսին: Նշեմ նաև, որ մեր երեխաների ուղղությամբ չի աշխատել ծանր հրետանի կամ ԱԹՍ-ներ, տեսանյութեր էլ կան, որ մարմիններն ամբողջական են»,- ասաց ակցիայի մասնակից ծնողը:

Լրագրողների հետ զրույցից հետո ծնողները մտան ԱԱԾ շենք, որտեղ աշխատակիցները սկսեցին ճշտումներ կատարել՝ արդյոք Աբազյանը կարո՞ղ է ընդունել նրանց:

Անհետ կորածների հարազատները ԱԱԾ շենք մտնելով՝ ասացին, որ այնտեղ են մնալու այնքան ժամանակ մինչև իրենց խնդրին լուծում տրվի: Լրագրողներին հորդորեցին դուրս գալ շենքից: