1 րոպեի ընթերցում
ԵՐԵՎԱՆ, 18 ՕԳՈՍՏՈՍԻ, ԱՐՄԵՆՊՐԵՍ: Ադրբեջանի նախագահը կարող է հայտարարել այն, ինչ կամենում է, բայց այդ հայտարարությունները իրականության հետ որևէ կապ չունեն: «Արմենպրես»-ի հաղորդմամբ՝ այս մասին լրագրողների հետ ճեպազրույցի ընթացքում ասել է ՀՀ զինված ուժերի գլխավոր շտաբի օպերատիվ գլխավոր վարչության պետ - ԶՈՒ ԳՇ պետի տեղակալ, գեներալ-մայոր Էդվարդ Ասրյանը՝ անդրադառնալով Ադրբեջանի նախագահ Իլհամ Ալիևի օգոստոսի 17-ի հայտարարությանը Սյունիքի մարզի Սև լճի և Հայաստանի այլ տարածքների նկատմամբ հավակնությունների մասին:
«Դա խեղաթյուրված պատմություն է, տեղեկատվություն է, որը մեզ համար հիմք չի հանդիսանում: Նրա հայտարարությունները ավելի են բարձրացնում մեր զգոնությունը, և մենք իր քաղաքական հայտարարության ներքո մեր դիրքերում, մեր սահմաններում պատրաստ ենք հետ մղելու նրա կազմակերպած ցանկացած սադրիչ գործողություն», - ընդգծել է գլխավոր շտաբի պետի տեղակալը:
Էդվարդ Ասրյանը Ազգային ժողովում մասնակցել էր խմբակցությունների ներկայացուցիչների հետ կազմակերպված փակ քննարկմանը, որը նվիրված էր հայ-ադրբեջանական սահմանին տիրող օպերատիվ-մարտավարական իրադրությանը: