Փոխվարչապետն ԱԶԲ գրասենյակի տնօրենի հետ քննարկել է ոլորտային համագործակցության հնարավորությունները
2 րոպեի ընթերցում
ԵՐԵՎԱՆ, 18 ՄԱՐՏԻ, ԱՐՄԵՆՊՐԵՍ: ՀՀ փոխվարչապետ Տիգրան Ավինյանը մարտի 18-ին հանդիպել է Ասիական զարգացման բանկի (ԱԶԲ) հայաստանյան գրասենյակի տնօրեն Պաոլո Սպանտիգատիին:
Ինչպես «Արմենպրես»-ին տեղեկացրին ՀՀ փոխվարչապետ Տիգրան Ավինյանի գրասենյակից, փոխվարչապետը, ողջունելով հյուրին, նշել է, որ Հայաստանի կառավարությունը մեծապես գնահատում է ԱԶԲ-ի հետ ընթացող համագործակցությունը: Տիգրան Ավինյանը շնորհակալություն է հայտնել ԱԶԲ-ին՝ կորոնավիրուսի համավարակի հաղթահարմանն ուղղված ՀՀ կառավարության ջանքերին սատարելու համար ոչ միայն առողջապահության, այլև կրթության ոլորտում: Նա նկատել է, որ ԱԶԲ-ն ՀՀ կառավարության կարևոր գործընկերներից է շուրջ 1 միլիարդ դոլարի հասնող ակտիվ պորտֆելով ոչ միայն հանրային, այլ նաև մասնավոր ոլորտում:
Տիգրան Ավինյանը ներկայացրել է Հայաստանի կառավարության ընդունած տնտեսական արձագանքման ծրագիրը և վերջինիս սահմանած առաջնահերթությունները՝ վերականգնել տնտեսական ակտիվությունը, ապահովել տնտեսական միջավայրի կայունությունը և զարգացնել միջնաժամկետ տնտեսական քաղաքականության օրակարգը: Փոխվարչապետը արտահայտել է ՀՀ կառավարության ակնկալիքը՝ տնտեսական արձագանքման ծրագրի շրջանակներում խորացնել ԱԶԲ-ի հետ համագործակցությունը: Նա միաժամանակ ընդգծել է ԱԶԲ-ի ցուցաբերած տեխնիկական աջակցությունը Կադաստրի թվայնացման, ազգային աշխարհատարածական տվյալների ստանդարտացման գործում:
Փոխվարչապետը մատնանշել է Հայաստանի կառավարության տնտեսական քաղաքականության առաջնահերթությունները: Այդ համատեքստում կողմերը քննարկել են ենթակառուցվածքների, մասնավորապես՝ տրանսպորտի, էներգիայի, քաղաքային միջավայրերի ու մարդկային կարողությունների զարգացման ոլորտներում համագործակցության հնարավորությունները: Քննարկման ընթացքում շոշափվել են նաև հաղորդակցությունների, տրանսպորտային հանգույցների ոլորտներում համագործակցության ընդլայնման տարբերակները: