ANCA-ն ԱՄՆ-ում Իսրայելի դեսպանին կոչ է արել, որ նրա երկիրը դադարեցնի զենքի վաճառքը Ադրբեջանին
2 րոպեի ընթերցում
ԵՐԵՎԱՆ, 6 ՀՈԿՏԵՄԲԵՐԻ, ԱՐՄԵՆՊՐԵՍ: ԱՄՆ Հայ դատի հանձնախմբի նախագահ Րաֆֆի Համբարյանը նամակ է ուղղել ԱՄՆ-ում Իսրայելի դեսպան Ռոն Դերմերին՝ կոչ անելով, որ նրա երկիրը դադարեցնի զենքի վաճառքը Ադրբեջանին:
«Արմենպրես»-ն այս մասին տեղեկացավ հանձնախմբի կայքից:
Համբարյանը դեսպանին, մասնավորապես, ասել է. «Համոզվեք, որ Իսրայելը երբեք չի մասնակցի երկրորդ Հայոց ցեղասպանությանը»:
Համբարյանը Իսրայելի դեսպան Ռոն Դերմերին ուղղված անկեղծ և ուղիղ նամակում, մասնավորապես, խնդրել է, որ Իսրայելն անմիջապես դադարեցնի մահացու կամ երկակի նշանակության նյութերի և տեխնոլոգիաների վաճառքը կամ փոխանցումը Ադրբեջանին:
«Մենք հուսով ենք, որ մեր մտահոգությունները շտապ կփոխանցեք Իսրայելի կառավարությանը՝ աշխատելու անհապաղ դադարեցնել զենքի վաճառքն ու փոխանցումներն Ադրբեջանին և երաշխավորել, որ Իսրայելը երբեք մեղսակից չլինի երկրորդ Հայոց ցեղասպանությանը»,-նամակում նշել է ԱՄՆ Հայ դատի հանձնախմբի նախագահը:
Արցախի հետ շփման գծի ողջ երկայնքով սեպտեմբերի 27-ի վաղ առավոտյան Ադրբեջանն ակտիվ հրետակոծություն է սկսել: Հրետակոծվում և հրթիռակոծվում են նաև խաղաղ բնակավայրերը, այդ թվում՝ մայրաքաղաք Ստեփանակերտը և Շուշին: Ադրբեջանի ԶՈՒ-ն թիրախավորել է նաև ՀՀ զինվորական և քաղաքացիական ենթակառուցվածքները:
Արցախում և Հայաստանում Ադրբեջանի սանձազերծած ագրեսիայի, ողջ զինանոցի կիրառման՝ հրետակոծման, ԱԹՍ հարվածների և հրթիռակոծման հետևանքով 21 քաղաքացիական անձ է զոհվել, վիրավորվել 80-ը: Հաստատված է նաև միջազգայնորեն արգելված կասետային ռումբերի կիրառման փաստը:
Արցախի նկատմամբ Ադրբեջանի սանձազերծած պատերազմում, նախնական տվյալներով, զոհվել է 240 զինծառայող և կամավորական:
Պատրաստեց Աննա Գրիգորյանը