2 րոպեի ընթերցում
ԵՐԵՎԱՆ, 12 ՀՈՒՆԻՍԻ, ԱՐՄԵՆՊՐԵՍ: Նորքի տուն ինտերնատում հնարավոր է եղել կանխել կորոնավիրուսային վարակի ավելի շատ տարածումը:
«Արմենպրես»-ի հաղորդմամբ՝ այս մասին խորհրդարանում լրագրողների հետ զրույցում ասաց ՀՀ աշխատանքի և սոցիալական հարցերի նախարար Զարուհի Բաթոյանը՝ խոսելով վարակի հնարավոր աղբյուրի մասին:
«Մեր տեղեկություններով՝ տարեցների խնամքի տանը գտնվող անձանցից մեկը տեղափոխվել է հիվանդանոց և թեև թեստավորման բացասական արդյունք է ունեցել, սակայն վերադառնալուց մի քանի օր անց նույն սենյակում գտնվող անձի մոտ է հայտնաբերվել կորոնավիրուս, հետո նաև՝ իր մոտ: Վարկածներից մեկն է, որ գուցե այդ վարակը կարող է նաև հիվանդանոցում լինել»,-ասաց Բաթոյանը:
Նա նշեց՝ մանկատանը ևս դեպքեր կան: Հիշեցրեց՝ այդ հաստատություններում կարանտին էր սահմանված դեռևս փետրվարից: Աշխատակիցները 14-օրյա հերթափոխային ռեժիմով են աշխատում: «Միևնույն է, որևէ կերպ չենք կարող ամբողջությամբ խնդիրը լուծել, որովհետև ասիմպտոմ դեպքեր են լինում, և նույնիսկ ջերմաչափումները ցույց չեն տալիս, միայն թեստավորման արդյունքում է հնարավոր լինում դա հայտնաբերել: Հիմա բոլոր միջոցառումներն իրականացվել են: Բարեբախտաբար, Նորքի տունինտերնատում վարակի տարածումը կանխվել է և ավելի շատ չի տարածվել»,-ասաց նախարարը:
Մայիսին հայտնի էր դարձել, որ Նորքի տունինտերնատում բնակվող ավելի քան 40 ավագ սերնդի ներկայացուցչի, ինչպես նաև անձնակազմից մի քանիսի մոտ հայտնաբերվել է կորոնավիրուսային հիվանդություն:
Աննա Գրիգորյան