Բաբաջանյանն առաջարկեց մարզպետարանները, քաղաքապետարանները տրամադրել հիվանդանոցային կարիքների համար
2 րոպեի ընթերցում
ԵՐԵՎԱՆ, 4 ՀՈՒՆԻՍԻ, ԱՐՄԵՆՊՐԵՍ: ՀՀ ազգային ժողովի անկախ պատգամավոր Արման Բաբաջանյանն առաջարկում է քաղաքապետարանները, մարզպետարանները և, եթե անհրաժեշտ է, նաև Ազգային ժողովը և մնացած բոլոր հաստատությունները տրամադրել հիվանդանոցային կարիքների համար: «Արմենպրես»-ի փոխանցմամբ՝ Բաբաջանյանն այս մասին ասաց ԱԺ-ում իր ելույթում:
«Տպավորությունն այնպիսին է, որ համավարակը վերջնականապես մեկուսացրել է Ազգային ժողովն այն խնդիրներից, որոնք եռում են դրսում»,- ասաց Արման Բաբաջանյանը:
Պատգամավորը նշեց՝ հունիսի 4-ի դրությամբ արձանագրվել է կորոնավիրուսի 697 նոր դեպք, նկատեց, որ վիճակը չի թուլանում, ավելի լարվում է:
«Երեկ և այսօր մենք լսում ենք, որ հիվանդանոցները գերբեռնված են, մահճակալների տեղ չկա։ Ես առաջարկում եմ, որ համայնքային սեփականության շենքերը՝ քաղաքապետարանները, մարզպետարանները և, եթե անհրաժեշտ է, Ազգային ժողովը և մնացած բոլոր հաստատությունները տրամադրենք հիվանդանոցային կարիքի համար, որովհետև բժիշկները ցանկանում են օգնել հիվանդներին: Եվ մենք պետք է ցույց տանք, որ ականջալուր ենք նրանց հորդորներին, պատրաստ ենք նրանց լսել: Ծանր հիվանդներն ըստ ցուցումի ուղարկվում են տներ»,- ասաց Բաբաջանյանն ու նշեց՝ կարծում է, որ այդ մարդկանց չպետք է թողնել իրենց տներում:
Նա գործընկերներին նաև հորդորեց արտահերթ նիստից հետո դուրս գալ փողոց, օգնել բժիշկներին, ոստիկաններին, համոզել քաղաքացիներին դիմակ կրել:
Աննա Գրիգորյան