1 րոպեի ընթերցում
ԵՐԵՎԱՆ, 6 ԱՊՐԻԼԻ, ԱՐՄԵՆՊՐԵՍ։ Հայաստանում ստեղծվելու է ապօրինի գույքի բռնագանձման համակարգ, որը հնարավորություն կտա կոռուպցիոներներից ապօրինի գույքը բռնագանձել և վերադարձնել պետությանը։ «Արմենպրես»-ի փոխանցմամբ՝ այս մասին ֆեյսբուքի ուղիղ եթերում ասաց ՀՀ վարչապետ Նիկոլ Փաշինյանը՝ պատասխանելով քաղաքացիների հարցերին:
«Հիմա Ազգային ժողովում քննարկվում է ապօրինի գույքի բռնագանձման մասին օրենքը, որն առաջին ընթերցմամբ ընդունվել է և, հուսով եմ, երկրորդ ընթերցմամբ կընդունվի։ Հանրապետության նախագահի կողմից օրենքը ստորագրելուց հետո, երբ օրենքը մտնի ուժի մեջ, Հայաստանում կսկսվի ապօրինի ձեռք բերված գույքի բռնագանձման գործընթաց, որը քրեական գործերի հետ կապ չունի։ Այս գործերը քաղաքացիական վարույթով են իրականացվելու և քրեական գործերից առանձին են քննվելու։ Դրա համար նոր համակարգ է ստեղծվելու, և այն կոռուպցիոներները, որոնք ապօրինի գույք են ձեռք բերել , այդ օրենք հնարավորություն կտա, որ մենք այդ գույքը բռնագանձենք և վերադարձնենք պետությանը և ժողովրդին»,- նշեց վարչապետը։
Փաշինյանի խոսքով՝ դա չի նշանակում, որ քրեական գործերով որոշումներ չեն կայացվելու։