2 րոպեի ընթերցում
ԵՐԵՎԱՆ, 29 ՓԵՏՐՎԱՐԻ, ԱՐՄԵՆՊՐԵՍ: Հովհաննես Թումանյանի «Քաջ Նազար» սիրված հեքիաթը բեմադրական, երաժշտական գեղեցիկ լուծումներով ներկայացվեց Կ. Ստանիսլավսկու անվան Ռուսական դրամատիկական թատրոնում:
«Արմենպրես»-ի հաղորդմամբ` ներկայացման առաջնախաղը տեղի ունեցավ փետրվարի 28-ին:
«Թումանյանի հոբելյանական տարում ինձ հուշեցին անդրադառնալ նրա ստեղծագործություններից որևէ մեկին: Իրականում շատ էի ցանկանում Ռուսական թատրոնում հայկական դասական որևէ գործ բեմադրել: Թումանյանը լավագույն ընտրությունն է, որովհետև նա համաշխարհային մեծության գրող է, իսկ «Քաջ Նազար»-ն արդիական էր երեկ, այսօր, վաղը և միշտ: Այն ոչ միայն հայկական է, այլև համամարդկային»,-ասաց թատրոնի գեղարվեստական ղեկավար և ներկայացման ռեժիսոր Կարեն Ներսիսյանը:
Ռեժիսորը շեշտեց, որ իսպանացիներն ունեն Դոն Կիխոտին, իսկ հայերը` Նազարին:
Պայծառ, վառ գույներով հարուստ ներկայացման մեջ զբաղված են թատրոնի երիտասարդ դերասանները: Նկարչական ձևավորման հեղինակը Անդրեյ Զապորոժսկին է, խորեոգրաֆիան` Նունե Կիրակոսյանի:
«Քաջ Նազար»-ից բացի, Ռուսական թատրոնն առաջիկայում թատերասերների դատին կհանձնի «Վարշավյան մեղեդի»-ն, որի ռեժիսորը Դիանա Բաբայանն է, Ներսիսյանն աշխատելու է Չեխովի «Բալի այգի» ներկայացման վրա, իսկ փոքր բեմում Մանվել Խաչատրյանը բեմադրելու է Դոստոևսկու «Խեղճ մարդիկ»-ը: