Թրամփը չի բացառել Ռուսաստանի նկատմամբ պատժամիջոցները չեղարկելու հնարավորությունը
1 րոպեի ընթերցում
![Թրամփը չի բացառել Ռուսաստանի նկատմամբ պատժամիջոցները չեղարկելու հնարավորությունը](http://armenpress.am/resized/480/static/news/b/2017/01/874543.jpg)
ԵՐԵՎԱՆ, 14 ՀՈՒՆՎԱՐԻ, ԱՐՄԵՆՊՐԵՍ: ԱՄՆ նորընտիր նախագահ Դոնալդ Թրամփը հայտարարել է, որ մտադիր է առժամանակ ուժի մեջ պահել Ռուսաստանի նկատմամբ սահմանված պատժամիջոցները, սակայն չի բացառել, որ ապագայում կարող է չեղարկել դրանք:
Ինչպես հաղորդում է «Արմենպրես»-ը, The Wall Street Journal-ին տված հարցազրույցում Թրամփն ընդգծել է, որ ԱՄՆ-ն կարող է չեղարկել պատժամիջոցները, եթե Ռուսաստանը համագործակցի ԱՄՆ-ի հետ որոշ հարցերում, մասնավորապես, ահաբեկչության դեմ պայքարում: «Եթե մենք կարող ենք միասին աշխատել, և եթե Ռուսաստանն իրոք օգնում է մեզ, ապա ինչո՞ւ չչեղարկել պատժամիջոցները»,-ասել է Դոնալդ Թրամփը:
Նա խոսել է նաև ՌԴ նախագահ Վլադիմիր Պուտինի հետ հանդիպելու հավանականության մասին` ընդգծելով, որ նման ցանկություն կա թե' Պուտինի, թե' իր կողմից:
ԱՄՆ նորընտիր նախագահի երդմնակալության արարողությունը տեղի կունենա հունվարի 20-ին: