Ծովագյուղը տոնական զարդարանքով կմնա մինչեւ հունվարի 14-ը
10:13, 13 Հունվար 2017
ԳԱՎԱՌ, 13 ՀՈՒՆՎԱՐԻ, ԱՐՄԵՆՊՐԵՍ : Գեղարքունիքի մարզի Ծովագյուղ համայնքի բնակչությունն այս տարվա Ամանորի եւ Սուրբ Ծննդյան տոների գիշերները դիմավորել է շքեղ լուսագունային ձեւավորման եւ համադրումների միջավայրում: Ինչպես «Արմենպրես»-ին տեղեկացրեց Ծովագյուղի գյուղապետ Վահրամ Գեւորգյանը, լուսագունային զարդարանքը տեղադրված է գիշերային լուսավորության ողջ ցանցի վրա՝ մոտ 20 կիլոմետր ընդհանուր երկարությամբ բոլոր թաղերում, գլխավոր ու երկրորդական բոլոր փողոցներում: Ծովագյուղցիներն Ամանորը դիմավորել են գյուղի կենտրոնում տեղադրված տոնածառի շուրջ՝ տոնական տրամադրությամբ, համերգով եւ հրավառությամբ, ուրախ տրամադրությունն այստեղ իշխում է նաև հունվարի 1-ին հաջորդող օրերին:
«Արդեն երրորդ տարին է, ինչ Ծովագյուղն Ամանորի տոներին նման շքեղ տեսք է ստանում: Մինչեւ հին տոմարով Նոր տարվա ավարտը գիշերային Ծովագյուղը մնալու է իր շքեղ, տոնական տեսքի մեջ: Մեր գյուղն իր գեղեցկությամբ, տոնական արդուզարդով նման է քաղաքի: Արդեն երեք տարի է, որ մենք մեր Ամանորը նման տոնական տրամադրություն ստեղծող միջավայրում ենք տոնում: Մեզանում ճաշակ է փոխվում, գեղեցկություն ստեղծելու ձգտում… Նախորդ տարում մեր գյուղը գյուղատնտեսական բարձր ցուցանիշներ գրանցեց, հաջող տնտեսական տարի փակեցինք, հնդկացորենի վերամշակման գործարան ունեցանք: Այդ ոգեւորությունը մեզ մղում է նոր ձեռքբերումների»,-նշեց Ծովագյուղի բնակիչ Նորիկ Սիմոնյանը:
Խոսրով ԽլղաթյանԲաժանորդագրվեք մեր ալիքին Telegram-ում