ԼՂ-ում ՏԻՄ ընտրությունները չեն ազդի բանակցային գործընթացի վրա. Ջեյմս Ուորլիք

ԵՐԵՎԱՆ, 2 ՍԵՊՏԵՄԲԵՐԻ, ԱՐՄԵՆՊՐԵՍ: Հայաստանի և Ադրբեջանի արտաքին գործերի նախարարներ Էդվարդ Նալբանդյանն ու Էլմար Մամեդյարովը կհանդիպեն սեպտեմբերին Նյու Յորքում՝ քննարկելու 2015 թվականին երկու երկրի նախագահների հանդիպման կազմակերպման հարցը: Ինչպես հաղորդում է «Արմենպրես»-ը, այս մասին ադրբեջանական AzerNews-ի հետ զրույցում հայտնել է ԵԱՀԿ Մինսկի խմբի ամերիկացի համանախագահ Ջեյմս Ուորլիքը:

«Համանախագահները երկու երկրի արտգործնախարարների հանդիպումը կկազմակերպեն ՄԱԿ-ի Գլխավոր ասամբլեայի շրջանակում: Մենք կքննարկենք նախարարների հետ ավելի ուշ այս տարվա ընթացքում նախագահների հանդիպման կազմակերպման հնարավորությունը»,- հայտնել է Ուորլիքը: Համանախագահը տեղեկացրել է, որ իրենք նախատեսում են աշնանը այց կատարել տարածաշրջան, սակայն այցի հստակ ժամկետները դեռ նախանշված չեն:

Անդրադառնալով Լեռնային Ղարաբաղում սեպտեմբերին կայանալիք տեղական ինքնակառավարման մարմինների ընտրությունների հարցին՝ Ուորլիքը նշել է, որ դրանք որևէ կերպ չեն ազդի ղարաբաղյան հակամարտության կարգավորման շուրջ ընթացքող խաղաղ բանակցային գործընթացի վրա:

Խոսելով վեջին շրջանում ղարաբաղա-ադրբեջանական շփման գծում և հայ-ադրբեջանական սահմանին առկա լարվածության մասին՝ Միսնկի խմբի ԱՄՆ համանախագահն ասել է. «Մենք դիմել ենք կողմերին՝ կոչ անելով թուլացնել լարվածությունը և հարգել հրադադարի համաձայնագիրը: Մենք նաև շարունակում ենք կոչ անել կողմերին ձեռնարկել վստահություն առաջացնող միջոցներ, որոնք կամրապնդեն հրադադարի ռեժիմը՝ բանակցությունների համար դրական միջավայր ստեղծելով, ինչը կհանգեցնի խնդրի կարգավորմանը»: