ԲՐՅՈՒՍԵԼ, 28 ՕԳՈՍՏՈՍԻ, ԱՐՄԵՆՊՐԵՍ: Պարզելու համար բելգիացիների վերաբերմունքը երրորդ երկրներից դեպի Եվրոպա եկող ներգաղթյալների վերաբերյալ` տեղական RTL հեռուստաընկերությունն ու La Derniere heure թերթը համատեղ սոցոլոգիական հարցում են անցկացրել, որին մասնակցել է 2000 քաղաքացի: «Արմենպրես»-ի փոխանցմամբ` հարցման արդյունքները փաստել են, որ բելգիացիների 81 տոկոսը դեմ է փախստականների հոսքին դեպի Եվրոպա, նրանք դեմ են նաև, որպեսզի Բրյուսելը հավելյալ միջոցներ տրամադրի փախստականների խնդիրների լուծման համար:
Հարցվածների 69 .9 տոկոսը հայտարարել է, որ ներգաղթյալների նոր հոսքը կվտանգի իրենց կենսակերպը:
2015թ. առաջին 6 ամիսների ընթացքում Բելգիայում փախստականի կացարան է խնդրել 12000 մարդ: Նրանց մեծ մասը Սիրիայից են, Իրաքից եւ Աֆղանստանից: 2014թ-ին Բելգիան ընդունել է 17000 փախստականի: Բելգիան հայտարարել էր, որ այս տարի կարող է ընդունել ընդամենը 16000 ներգաղթյալի: Թեպետ տարին դեռ չի ավարտվել, սակայն ներգաղթյալների թիվն ավելին է, քան նախատեսված էր: Այդ կապակցությամբ Բելգիայի Փախստականների եւ միգրացիայի հարցերով պետքարտուղար Թեո Ֆրանկեն առաջարկել է կառավարությանը չօգտագործվող զորամասերում տեղ հատկացնել եւս 2500 ներգաղթյալների համար: