ՀՀ պաշտպանության նախարարը մեր օերի հաղթանակները համարում է 1918-ի հերոսամարտերի շարունակությունը

ԵՐԵՎԱՆ, 28 ՄԱՅԻՍԻ, ԱՐՄԵՆՊՐԵՍ:ՀՀ պաշտպանության նախարար Սեյրան Օհանյանը հայ ժողովրդի տարած հաղթանակների շարունակությունն է համարում սահմանին կանգնած հայ զինվորների սխրանքներն ու հերոսությունները: Սարդարապատի հուշահամալիրում լրագրողների հետ զրույցում ՀՀ պաշտպանության նախարար Սեյրան Օհանյանն ընդգծեց, որ հայ ժողովրդի հաղթանակները շարունակական են: «Արցախյան ազատամարտից հետո էլ մեր հաղթանակը կարելի է համարել սահմանին կանգնած հայ զինվորի հերոսությունը: Մեզ համար հաղթանակ է և հպարտություն, որ հայ զինվորը սահմանին խրոխտ կանգնած հսկում է հայ ժողովրդի խաղաղ արարումը»,- «Արմենպրես»-ի փոխանցմամբ՝ շեշտեց նախարարը:

Նա ընդգծեց, որ հայ ժողովուրդը միշտ էլ ունեցել է հերոսական հաղթանակներ: Սեյրան Օհանյանի խոսքով՝ 1918թ. մայիսի Սարդարապատի, Բաշ-Ապարանի և Ղարաքիլիսայի ճակատամարտերից հետո հայ ժողոուրդն ունեցել է Շուշիի ազատագրում և Արցախյան ազատամարտում տարած փայլուն հաղթանակ:

Սարդարապատում մեկնարկել է Հանրապետության տոնի՝ Հայաստանի Առաջին Հանրապետության հիմնադրման և Սարդարապատի ճակատամարտում հաղթանակի 97-ամյակի տոնակատարությունը: