387.58
Բունդեսթագում ապրիլի 24-ին քննարկման կդրվի Ցեղասպանությունը ճանաչող բանաձև. Թեսա Հոֆմանը մեծ սպասելիքներ չունի
2 րոպեի ընթերցում
ԵՐԵՎԱՆ, 3 ԱՊՐԻԼԻ, ԱՐՄԵՆՊՐԵՍ: Գերմանիայի Բունդեսթագում ապրիլի 24-ին կայանալիք նիստի ժամանակ ընդդիմադիր Ձախակողմյանները (The Left) քննարկման կառաջադրեն բանաձև, որը պահանջում է հայերի հետ կատարվածը ճանաչել որպես ցեղասպանություն: Այդուհանդերձ, Գերմանիայի խորհրդարանում նման բանաձևի ընդունման շատ քիչ հավանականություն կա: Այս մասին «Արմենպրես»-ի հետ զրույցում ասաց գերմանացի հայտնի ցեղասպանագետ Թեսա Հոֆմանը:
Նա ընդգծեց, որ նույն օրը քննարկման համար մեկ այլ բանաձև է հեղինակել նաև իշխող Քրիստոնեադեմոկրատական կուսակցությունը, որը, սակայն, կարծես կրկնում է Բունդեսթագի` 2005 թվականին կայացրած որոշումը:
«Վերոնշյալ նախագծի տեքստը դեռ հրապարակված չէ, սակայն դրա խորագիրը կրկին կրում է առանցքային «արտաքսում և կոտորած» բառերը: Այսինքն, դրանում չկա հավանականություն, որ կատարվածը կճանաչվի որպես ցեղասպանություն, բանաձևը պարզապես կրկնությունն է այն ամենի, ինչը մենք ունենք արդեն տասը տարի: Որպես բանաձևի մեկնաբանության լավագույն տարբերակ՝ դուք կարող եք այն ընդունել որպես «թաքնված ճանաչում», սակայն, ըստ էության, դա չի արդարացնում ոչ հայ համայնքի, ոչ էլ ցեղասպանագետների և մարդու իրավունքների պաշտպանների ակնկալիքները»,- «Արմենպրես»-ին ասաց գերմանացի ցեղասպանագետը:
Հոֆմանը հավելեց, որ քննարկումներն, ամենայն հավանականությամբ, տեղի կունենան ապրիլի 24-ին` կեսօրին` որպես օրակարգում առկա 31 թեմաներից 27-րդը, և կտևեն 65 րոպե: Նա քիչ հավանական է համարում շատ խորհրդարանականների ներկայությունը` հաշվի առնելով, որ նիստը կայանալու է ուրբաթ կեսօրին: «Մի ունեցեք մեծ ակնկալիքներ»,- Բունդեսթագում ապրիլքսանչորսյան քննարկման մասին խոսելիս այսպես եզրափակեց ցեղասպանգետը:
