Մալայզիացի ոստիկանները ժամանել են Կիեւ՝ օգնելու Boeing-ի հետաքննությանը

ԵՐԵՎԱՆ, 31 ՀՈՒԼԻՍԻ, ԱՐՄԵՆՊՐԵՍ: Կիեւ է ժամանել մալայզիացի 68 ոստիկաններից բաղկացած խումբը՝ աջակցելու Boeing-ի կործանման հետաքննությանը: Այդ մասին, ինչպես տեղեկացնում է «Արմենպրես»-ը, ասված է Մալայզիայի վարչապետ Նաջիբ Ռազակի՝ հուլիսի 31-ին հրապարակված հայտարարության մեջ:

«Մալայզիայի 68 ոստիկաններից բաղկացած խումբը Կիեւ է ժամանել այսօր՝ հուլիսի 31-ին»,-ասված Է Ռազակի հայտարարության մեջ: Վարչապետը հավելել Է, որ ոստիկանները «կաշխատեն Նիդեռլանդների եւ Ավստրալիայի թիմերի հետ համատեղ՝ ապահովելու ինքնաթիռի կործանման վայր հասնելու անվտանգությունը»:

Ավելի վաղ հաղորդվել Է, որ օտարերկրյա փորձագետների միջազգային խումբը հուլիսի 31-ին առաջին անգամ կարողացել Է հասնել Ուկրաինայի արեւելքում Malaysia Airlines-ի մարդատար ինքնաթիռի կործանման վայր: Սպասվում Է, որ Նիդեռլանդներից ու Ավստրալիայից ժամանած փորձագետներն առաջին փուլում կզբաղվեն վթարի զոհերի մարմնամասերի եւ ուղեւորների ու անձնակազմի անդամների անձնական իրերի որոնմամբ:

Boeing-777-ը, որը MH17 չվերթն Էր կատարում Ամստերդամ-Քուալա Լումպուր ուղեգծով, հուլիսի 17-ին կործանվել Է Դոնեցկի մարզում: Ինքնաթիռում գտնվում Էր 298 ուղեւոր. նրանք բոլորը զոհվել են, հաղորդել Է ՌԻԱ Նովոստին: