ՍՏՐԱՍԲՈՒՐԳ, 2 ՀՈԿՏԵՄԲԵՐԻ, ԱՐՄԵՆՊՐԵՍ: Հայաստանը շարունակելու է շահավետ համագործակցությունը Եվրամիության հետ: Այս մասին հայտարարեց ՀՀ Նախագահ Սերժ Սարգսյանը` ելույթ ունենալով Եվրախորհրդի խորհրդարանական վեհաժողովի լիագումար նիստում: «Մենք ասել ու շարունակում ենք ասել, որ Հայաստանը ձգտում է մոտ լինել Եվրոպային»,-ասել է ՀՀ Նախագահը` կարեւոր նախաձեռնություն համարելով Արեւելյան գործընկերության ծրագիրը, որն իր ուրույն դերն ունի մի շարք նշանակալի բարեփոխումների գործում:

Սարգսյանը նաեւ ընդգծել է, որ Հայաստանն ունի դաշնակցային հարաբերություններ Ռուսաստանի հետ, որը արդյունավետորեն կշարունակվի: «Հայաստանը երբեք չի ձգտել համագործակցություն կառուցել մի գործընկերոջ հետ` ի հակադրություն մյուս գործընկերների»,-հայտարարեց Սերժ Սարգսյանը:

Նա նաեւ ընդգծեց, որ Հայաստանը հավատարիմ է Լեռնային Ղարաբաղի հակամարտության խաղաղ կարգավորմանը եւ գնահատում է բոլոր նրանց ջանքերը, ովքեր աջակցում են ԼՂ հակամարտության կարգավորմանը: ՀՀ Նախագահը կարեւորեց վստահության միջոցների կառուցումը: «Ղարաբաղը ձեզ համար տարածք է, իսկ մեզ համար սուրբ հայրենիք»,-մեծանուն դերասան Սոս Սարգսյանի խոսերը մեջբերեց ՀՀ Նախագահը` ցավով նշելով, որ Հայաստանն օրեր առաջ հողին հանձնեց անվանի դերասանին:

Սերժ Սարգսյանը խոսեց նաեւ Հայոց ցեղասպանության միջազգային ճանաչման անհրաժեշտության մասին: