ԵՐԵՎԱՆ, 19 ՍԵՊՏԵՄԲԵՐԻ, ԱՐՄԵՆՊՐԵՍ: Կանանց` Եվրոպայի 2013-ի թվականի առաջնության Հայաստան-Չեխիա ֆուտբոլային հանդիպմանը մեր ընտրանին զիջեց 2-0 հաշվով:

«Արմենպրես»-ի հաղորդմամբ` հանդիպման արդեն 13-րդ րոպեին հյուրերը բացեցին խաղի հաշիվը. գոլի հեղինակ դարձավ Մարկետա Ռինգելովան: Չեխերը շարունակեցին տիրել խաղային իրավիճակին` ավելի հաճախակի ստանալով տարածքային առավելություն: Սակայն խաղի առաջին կեսում դարպասի նոր գրավում չարձանագրվեց: Երկրորդ խաղակեսի մեկնարկային րոպեներին չեխերին հաջողվեց կրկնապատկել հաշիվը: 66-րդ րոպեին մեր դարպասը գրավեց Նիկոլա Դանիելկովան: Ի վերջո` այս խաղում դարպասի նոր գրավում այդպես էլ չարձանագրվեց, իսկ Հայաստանի կանանց հավաքականը հերթական անգամ պարտություն կրեց:  

Հայաստանի կանանց ազգային հավաքականի հետ մեկտեղ նույն` 7-րդ խմբում ընդգրկված են նաեւ Ավստրիայի, Դանիայի, Չեխիայի եւ Պորտուգալիայի ընտրանիները: Մրցաշարային աղյուսակը գլխավորում է Ավստրիայի հավաքականը, որն ունի 19 միավոր, երկրորդ եւ երրորդ տեղերը համապատասխանաբար զբաղեցնում են Դանիայի (18 միավոր) եւ Չեխիայի (13 միավոր) ընտրանիները: