ԵՐԵՎԱՆ, 9 ՓԵՏՐՎԱՐԻ, ԱՐՄԵՆՊՐԵՍ: Հուսով եմ, որ Սահմանադրական խորհուրդը հավանություն կտա Ցեղասպանությունների ժխտումը քրեականացնող օրինագծին` նրա վերաբերյալ բոլոր թեր և դեմ կարծիքները հաշվի առնելով: Ինչպես փոխանցում է «Արմենպրես»-ը, այս մասին նշել է Ֆրանսիայի Ազգային ժողովի պատգամավոր Վալերի Բուայեն` Nouvelles d'Armenie-ին տված հարցազրույցում:

«Մենք շարունակելու ենք հետևել իրադարձությունների զարգացմանը, սակայն ես վախենում եմ, որ Սահմանադրական խորհուրդը ստիպված կլինի դիմակայել մեծ ճնշումների»,- նշել է Բուայեն:  

Նրա խոսքով` այս հարցի մասին Ֆրանսիայում խոսվում է արդեն շուրջ տասը տարի: «Այդ պատճառով էլ ես զարմացած եմ, որ Սահմանադրական խորհուրդ դիմում է ներկայացվել այս հարցով»,- հավելել է ֆրանսիացի պատգամավորը:

Նրա ներկայացմամբ` ցեղասպանությունների ժխտումը քրեականացնող օրինագծի ընդունմամբ` Ֆրանսիան վերահաստատում է Հանրապետության արժեքները` ազատությունը, եղբայրությունը և հավասարությունը: Հենց այդ պատճառով էլ մենք կողմ ենք քվեարկել օրինագծին: Չեմ հասկանում` ինչպես կարելի է տարբերություն դնել ցեղասպանությունների զոհերի միջև. սա հենց հավասարության սկզբունքի խախտում է»,- ընդգծել է Վալերի Բուայեն:

Օրինագիծը, որը մեկ տարվա ազատազրկման եւ 45 հազար եվրոյի պատիժ է սահմանում Հայոց Ցեղասպանության ժխտման համար, Ֆրանսիայի Սենատում ընդունվել է հունվարի 23-ին: Մի խումբ պատգամավորներ, սակայն, կանխեցին դրա ստորագրումը նախագահ Սարկոզիի կողմից` դիմելով Սահմանադրական խորհուրդ: Ակնկալվում է, որ խորհուրդը այս ամսվա ընթացքում որոշում կկայացնի օրինագծի առնչությամբ: