Ժամանակը Երևանում՝ 11:07:36,   20 Նոյեմբեր

Վախճանվել է դրամատուրգ Արտաշես Բաբայանը


ԵՐԵՎԱՆ, 30 ԴԵԿՏԵՄԲԵՐԻ, ԱՐՄԵՆՊՐԵՍ: Երեւանում երեկ, 86 տարեկանում վախճանվել է դրամատուրգ, թարգմանիչ, թատերագետ, 1964թ. ՀԳՄ անդամ Արտաշես Բաբայանը: Արտաշես Մնացականի Բաբայանը ծնվել է 1923թ. հոկտեմբերի 25-ին Կամոյի շրջանի Սարուխան գյուղում (այժմ՝ ՀՀ Գեղարքունիքի մարզ)։ Ավարտել է Երեւանի գեղարվեստաթատերական ինստիտուտի թատերագիտական ֆակուլտետը։ Աշխատել է Հ. Պարոնյանի անվան երաժշտական կոմեդիայի պետական թատրոնում, Հայաստանի կուլտուրայի մինիստրության արվեստի գործերի գլխավոր վարչությունում, Թատերական գործիչների միությունում՝ վարելով պատասխանատու պաշտոններ։ Նա գրել է երեք տասնյակ թատերգություններ, որոնք բեմադրվել են Հայաստանի եւ արտերկրի հայկական թատերախմբերի կողմից։ Թարգմանել է նաեւ թատերգություններ, որոնք բեմադրվել են Հայաստանի տարբեր թատրոններում։ Հեղինակ է բազմաթիվ թատերագիտական հոդվածների, ռադիոպիեսների եւ փաստագրական ֆիլմերի սցենարների։ Հեղինակ է մոտ մեկ տասնյակ ժողովածուների, որոնցում հիմնականում հրապարակվել են իր պիեսները: «Սիրտը կանչում է» թատերգությունը բեմադրվել է Բուխարեստի Յամբոլա քաղաքի ազգային թատրոնում եւ արժանացել «Տարվա լավագույն ներկայացում» մրցանակի։ Գրողին 1975թ. շնորհվել է ՀՍՍՀ արվեստի վաստակավոր գործչի կոչում։




Լրահոս

Բոլոր նորությունները    




Գործակալության մասին

Հասցե՝ Հայաստան, 0002, Երեւան, Սարյան փող 22, Արմենպրես
Հեռ.՝ +374 11 539818
Էլ-փոստ՝ [email protected]
Яндекс.Метрика
Էջի կարգավորումներ