Շամլուղում վնասվածքներ ստացած 9-ամյա երեխան Երևան է տեղափոխվել սանավիացիայի ուղղաթիռով. վիճակը գնահատվում է բավարար
1 րոպեի ընթերցում
![Շամլուղում վնասվածքներ ստացած 9-ամյա երեխան Երևան է տեղափոխվել սանավիացիայի ուղղաթիռով. վիճակը գնահատվում է բավարար](http://armenpress.am/resized/480/static/news/b/2024/06/1138641.jpg)
ԵՐԵՎԱՆ, 3 ՀՈՒՆԻՍԻ, ԱՐՄԵՆՊՐԵՍ։ Շամլուղ բնակավայրից հունիսի 2-ին ժամը 14:30-ի սահմաններում շտապ օգնության կանչ է գրանցվել՝ 9-ամյա երեխայի որովայնի բութ տրավմա՝ շոկային վիճակ ախտորոշմամբ: Շտապ օգնության մեքենան, որը հերթապահում էր Ախթալայի ժամանակավոր կամրջի մոտ, տարհանել է երեխային և շտապ տեղափոխել «Ալավերդու Բժշկական Կենտրոն» ՓԲԸ:
Ինչպես «Արմենպրես»-ը տեղեկանում է ԲԿ-ի տարածած հաղորդագրությունից, հետազոտություններից պարզ է դարձել, որ Հ. Սոխակյանը հեծանիվից վայր ընկնելուց ստացել է ենթաստամոքսային գեղձի լուրջ վնասվածք, որոշվել է տեղափոխել մասնագիտացված բուժ հաստատություն՝ Արաբկիր բժշկական կենտրոն:
«ՀՀ Լոռու մարզային պատասխանատուների և «Ալավերդու Բժշկական Կենտրոն» ՓԲԸ-ի տնօրինության կողմից անմիջապես հրավիրվել է սանավիացիա, արագ կազմակերպվել է երեխայի տեղափոխումն՝ Արմենիան Հելլիկոպտեր ընկերության ուղղաթիռով»,- նշված է «Ալավերդու Բժշկական Կենտրոն»-ի տարածած հաղորդագրության մեջ:
Ներկայումս երեխայի վիճակը բավարար է, գտնվում է բուժման մեջ՝ Արաբկիր բժշկական կենտրոնում: