Ալավերդին ամբողջությամբ պարալիզացված է. տեղի հեռուստաընկերությունը մանրամասներ է հաղորդում
1 րոպեի ընթերցում
![Ալավերդին ամբողջությամբ պարալիզացված է. տեղի հեռուստաընկերությունը մանրամասներ է հաղորդում](http://armenpress.am/resized/480/static/news/b/2024/05/1137975.jpg)
ԵՐԵՎԱՆ, 26 ՄԱՅԻՍԻ, ԱՐՄԵՆՊՐԵՍ: Տևական անձրևներից հետո մայիսի 25-ի լույս 26-ի գիշերը Դեբեդ գետի վարարման հետևանքով Ալավերդի քաղաքում ջրի տակ են մնացել տասնյակ շինություններ, խանութներ, ավտոմեքենաներ:
«Արմենպրես»- ի հաղորդմամբ՝ այս մասին հայտնում է Ալավերդու «Անկյուն +3» հեռուստաընկերությունը՝ մանրամասնելով, որ Դեբեդ գետը դուրս է եկել հունից՝ լցվելով Ալավերդի քաղաքի բնակելի շենքերի նկուղներ, առաջին հարկեր, ջրի տակ թողնելով տասնյակ շինություններ, խանութներ, ջրի տակ են անցել նաև տասնյակ մեքենաներ:
Աղբյուրի տեղեկատվությամբ՝ Ալավերդի քաղաքն ամբողջությամբ պարալիզացված է:
Հորդառատ անձրևներիից Լոռու և Տավուշի մարզերում, Երևանում, ինչպես նաև Դեբեդ, Աղստև, Տաշիր գետերի վարարման հետևանքով հեղեղումների առաջացրած արտակարգ իրավիճակի կառավարման նպատակով վարչապետ Նիկոլ Փաշինյանի որոշմամբ ձևավորվել է օպերատիվ շտաբ՝ ՀՀ տարածքային կառավարման և ենթակառուցվածքների նախարար Գնել Սանոսյանի գլխավորությամբ: